Rasija nie vyklučaje ŭzbrojenaha kanfliktu z NATA ŭ najbližejšaje dziesiacihodździe
Armija RF pavinna być hatova da mahčymaha vajennaha kanfliktu z NATA ŭ najbližejšaje dziesiacihodździe, zajaviŭ ministr abarony RF Andrej Biełavusaŭ na vynikovaj kalehii Minabarony RF u Maskvie.
16.12.2024 / 15:17
Ministr abarony Rasii Andrej Biełavusaŭ
Ministr abarony Rasii 16 śniežnia zajaviŭ pra mahčymaść vajennaha kanfliktu z NATA «ŭ najbližejšaje dziesiacihodździe». Pavodle słoŭ Biełavusava, ab mahčymaści takoha kanfliktu nibyta havorać rašeńni, pryniatyja na samicie NATA, jaki prajšoŭ u lipieni hetaha hoda, a taksama «heta znachodzić adlustravańnie ŭ daktrynalnych dakumientach ZŠA i inšych krain NATA», dadaŭ Biełavusaŭ.
Taksama jon nazvaŭ niekatoryja ličby.
Tak, pa słovach Biełavusava, uzrovień vydatkaŭ na nacyjanalnuju abaronu ŭ RF dasiahnuŭ pakazčyka ŭ 6,3% VUP, što składaje 32,5% fiederalnaha biudžetu.
Taksama jon zajaviŭ, što ŭ ciapierašni čas rasijskimi vojskami vykarystoŭvajecca bolš za 3,5 tysiač bieśpiłotnikaŭ, i hetaja ličba pastajanna raście. U RF sfarmirujuć novy rod vojskaŭ — «vojski bieśpiłotnych sistem», zavieršać ich stvareńnie ŭžo ŭ trecim kvartale 2025 hoda.
Zvyš za 427 tysiač čałaviek z pačatku 2024 hoda pastupili na słužbu pa kantrakcie, pavodle słoŭ Biełavusava.
Rasijskija vajskoŭcy ŭ paraŭnańni z 2022 hodam atrymlivajuć u 7 razoŭ bolš tankaŭ, u 3 razy bolš BMP i BTR i ŭ 23 razy bolš bieśpiłotnikaŭ.
Pa viersii Biełavusava, rasijskaja SPA źbiła ŭ 2024 hodzie 86 rakiet Storm Shadow i Scalp, 215 ATACMS, 1629 snaradaŭ HIMARS, bolš za 27 tysiač bieśpiłotnikaŭ.
U nastupnym hodzie, pavodle Minabarony, u Rasii źbirajucca maštabavać vytvorčaść kompleksu siaredniaj dalokaści «Arešnik».
Biełavusaŭ daručyŭ zabiaśpiečyć abaronu arsienałaŭ i baz haruča-zmazačnych materyjałaŭ u zonie dasiažnaści srodkaŭ paražeńnia USU.
U nastupnym hodzie va US RF pastupiać stratehičnaja APŁ «Kniaź Pažarski» i čatyry rakietanoscy Tu-160M.
Biełavusaŭ taksama zajaviŭ, što USU z 2022 hoda stracili amal 1 młn čałaviek. U hetym hodzie straty USU pieravysili 560 tysiač vajskoŭcaŭ zabitymi i paranienymi. U kurskaj apieracyi ŭkraincy stracili bolš za 40 tysiač vajskoŭcaŭ, śćviardžaje Biełavusaŭ.
Prezident RF Uładzimir Pucin zajaviŭ, u svaju čarhu, što adychodziačy hod «staŭ znakavym u dasiahnieńni met śpiecyjalnaj vajennaj apieracyi». Pavodle jaho słoŭ, US Rasii «tryvała vałodajuć stratehičnaj inicyjatyvaj na ŭsioj linii bajavoha sudakranańnia».
Štatnaja kolkaść US Rasii pavyšana da 1,5 młn vajskoŭcaŭ, dadaŭ Pucin. Štodnia bolš za tysiaču rasijan pastupajuć na słužbu US Rasii pa kantrakcie, «ludzi dobraachvotna iduć na front», śćviardžaje jon.