Экс-кіраўніку Нагорнага Карабаха Баку выставіў 45 абвінавачванняў. Яму пагражае пажыццёвае
Пракуратура Азербайджана выставіла экс-дзяржаўнаму міністру Нагорнага Карабаха Рубену Варданяну, які ўжо больш за год знаходзіцца ў зняволенні ў бакінскай турме, новы аб'ёмны пакет абвінавачванняў па 45 пунктах. Як паведамляе яго адвакацкая група, па гэтых абвінавачваннях Варданяну пагражае пажыццёвае пазбаўленне волі, піша Армянская служба Радыё Свабода.
17.12.2024 / 11:03
Паводле заявы абаронцаў, новыя абвінавачванні на адрас Варданяна звязаныя з 20 артыкуламі Крымінальнага кодэкса Азербайджана.
Экс-чыноўнік быў арыштаваны азербайджанскімі памежнікамі 27 верасня 2023 года на прапускным пункце на мосце Хакары пасля нападу Азербайджана на Нагорны Карабах і наступнай ліквідацыі рэгіёну.
Баку абвінавачвае Варданяна ў «фінансаванні тэрарызму, стварэнні незаконных узброеных фарміраванняў і незаконным перасячэнні мяжы Азербайджана».
У заяве адвакацкай групы Варданяна адзначаецца, што меркаваныя «доказы» новых абвінавачванняў цалкам схаваныя як ад самога Варданяна, так і ад грамадскасці пад падставай іх сувязі з «нацыянальнай бяспекай Азербайджана».
Баку таксама адмовіўся перадаць копіі «доказаў» Варданяну і яго адвакатам.
Міжнародны юрыдычны дарадца сям'і Варданяна Джарэд Генсер нядаўна ў інтэрв'ю Азербайджанскай службе «Радыё Свабода» заявіў, што адміністрацыя Аліева паслядоўна адхіляе яго запыты на наведванне Варданяна ў Баку.
«Адмова Азербайджана апублікаваць і даць доступ да ўсіх абвінавачванняў супраць Варданяна і так званых доказаў пацвярджае іх палітычную матывацыю», — адзначыў ён.
Азербайджанскія ўлады абверглі гэтыя заявы, але адначасова адхілілі запыт адвакатаў на наведванне турмы, што робіць немагчымым збор доказаў.