Sud u Bałharyi staŭ na bok biełarusa, jakomu admovili ŭ prytułku. Budzie novy razhlad spravy
Pieršapačatkova mihracyjnyja ŭłady Bałharyi paličyli, što prośbitu abarony ničoha nie pahražaje ŭ Biełarusi, jakuju jon pakinuŭ «bieśpieraškodna i lehalna», nahadvaje Radyjo Svaboda.
17.12.2024 / 15:14
Stalica Bałharyi Safija. Fota: ntv.com.tr.
Hramadzianin Biełarusi Anton (imia hieroja źmienienaje dziela biaśpieki. — RS) kaža, što ŭ 2020 hodzie z žonkaj i dziećmi žyŭ u Miensku, pracavaŭ inžyneram. Žonka — u halinie IT. Pa słovach surazmoŭcy, padčas prezydenckaj vybarčaj kampanii jon zapisaŭsia ŭ adnu ź inicyjatyŭnych hrup pa zbory podpisaŭ u padtrymku alternatyŭnaha kandydata.
«Aktyŭna źbiraŭ podpisy ŭ padtrymku Babaryki, chadziŭ na pratesty, traplaŭ na videa, bo davaŭ interviju ŚMI. Heta prykłaŭ i da spravy, kali padavaŭsia ŭ Baŭharyi na prytułak. Žonku zatrymlivali na adnym z maršaŭ, paźniej pryznačyli štraf», — uspaminaje svaje pryhody ŭ 2020 hodzie Anton.
U 2022-m siamja pierajechała ŭ Hruziju, paźniej — u Baŭharyju, dzie biełarus u 2024 hodzie paprasiŭ prytułku. Ale Ahienctva ŭ spravach uciekačoŭ paličyła, što jahonych arhumentaŭ niedastatkova, kab dać prytułak. Mihracyjnyja ŭłady Baŭharyi pryjšli da vysnovy ab nieabhruntavanaści padadzienaha prašeńnia.
«Pryčyny, na padstavie jakich zamiežny hramadzianin źviartajecca z prašeńniem, nie paćviardžajuć abhruntavanych strachaŭ pieraśledu ci realnaj niebiaśpieki pryčynieńnia surjoznaj škody», — havaryłasia ŭ admovie.
Pavodle versii Ahienctva, analiz historyi ŭciekača pakazvaŭ, što «adzinaj pryčynaj, ź jakoj zajaŭnik źviarnuŭsia pa abaronu ŭ Baŭharyi, była zroblenaja jahonaj žoncy prapanova ab pracy ŭ Baŭharyi». Prośbit abarony «bieśpieraškodna i lehalna pakinuŭ Biełaruś 17 lutaha 2022 hodu». Ahienctva taksama zadavała pytańnie, čamu zamiežny hramadzianin nie paprasiŭ prytułku ŭ Hruzii, i staviła pad sumnieŭ śćvierdžańni, što toj pakinuŭ Biełaruś, bajučysia pieraśledu.
Historyju Antona mihracyjnyja ŭłady Baŭharyi rascanili jak «niaŭmiełuju sprobu nadać palityčnaje adcieńnie svajoj historyi ŭciekača, realnaj i adzinaj metaj jakoj źjaŭlajecca lehalizacyja znachodžańnia ŭ Baŭharyi». Ahienctva pry razhladzie spravy spasyłałasia na zaklučeńnie mižnarodnych struktur ab sytuacyi ŭ Biełarusi za 2014 hod.
«Uvaha śvietu pieraklučyłasia na inšyja surjoznyja kryzisy»
U kastryčniku 2024 hodu Anton źviarnuŭsia ŭ Administracyjny sud u Safii z prośbaj pierahladu jaho zajaŭki na atrymańnie prytułku. Pry razhladzie skarhi biełarusa sud dasłaŭ zapyt u Ahienctva ŭ spravach uciekačoŭ adnosna sytuacyi ŭ Biełarusi. Jak vynikaje z atrymanaha biełarusam adkazu, na hety raz Ahienctva skarystałasia abnoŭlenaj infarmacyjaj. 16 śniežnia Anton atrymaŭ rašeńnie Administracyjnaha sudu, dzie abskardžvaŭ admovu ŭ davańni prytułku (kopija dakumenta jość u redakcyi. — RS).
«U toj čas, kali ŭvaha śvietu pieraklučyłasia na inšyja surjoznyja humanitarnyja kryzisy, biełarusy pa-raniejšamu sutykajucca z žorstkimi represijami, jakija časta zastajucca niezaŭvažanymi i nie aśviatlajucca ŭ ŚMI. Masavyja represii suprać narodu Biełarusi nie ścichajuć», — havorycca ŭ novaj daviedcy ad Ahienctva ŭ spravach uciekačoŭ.
Sud taksama paličyŭ nieabhruntavanymi dovady mihracyjnych uładaŭ ab tym, što Hruzija źjaŭlajecca biaśpiečnaj krainaj, bo «sytuacyja tam napružanaja, jana achoplenaja pratestami, kraina masava admaŭlaje biełarusam u prytułku».
Administracyjny sud Safii vyrašyŭ admianić rašeńnie Ahienctva ŭ spravach uciekačoŭ i abaviazać jaho pryniać novaje rašeńnie ŭ spravie biełarusa.
Anton zadavoleny pryniatym rašeńniem. Kaža, što narešcie sustreŭsia z poŭnym razumieńniem kantekstu sytuacyi ŭ Biełarusi, bo pieršaje rašeńnie mihracyjnych uładaŭ dla jaho było dosyć absurdnym. Ciapier jon moža raźličvać na niekalki varyjantaŭ raźvićcia padziej. Naprykład, Ahienctva ŭ spravach uciekačoŭ moža abskardzić rašeńnie Administracyjnaha sudu ŭ Viarchoŭnym. Ale kali Viarchoŭny sud stanie na bok biełarusa, to mihracyjnyja ŭłady Baŭharyi buduć abaviazanyja pierahladzieć spravu ŭ pazytyŭny dla Antona bok. Ahienctva ŭ spravach uciekačoŭ moža pahadzicca z Administracyjnym sudom i vynieści novaje rašeńnie ŭ spravie.
«Jašče varyjant — tearetyčna, u miežach zakonu, ja ciapier mahu spahnać z Ahienctva raschody na advakata, pierakłady i tak dalej. Heta mahčymaść prapisanaja ŭ rašeńni sudu. Ale ja mahu hetaha nie rabić i pakul nie rabiŭ. Spadziajusia, mirna damovimsia z Ahienctvam», — razvažaje biełarus.
Anton ličyć, što takoje rašeńnie sudu moža ŭ budučyni pazytyŭna paŭpłyvać na rašeńni spraŭ biełarusaŭ, jakija buduć padavacca na prytułak.
«Paradavała, što sudździa lahična raśpisaŭ, što Hruzija nie źjaŭlajecca dla biełarusa biaśpiečnaj krainaj. Bo mihracyjnyja ŭłady akurat papikali mianie, što ja moh by padacca na prytułak u Hruzii», — dadaŭ Anton.
Jon spadziajecca, što jahonaja sprava vyrašycca pazytyŭna.