Стала вядома, за што пасадзілі на чатыры гады журналістку Вольгу Радзівонаву
На мінулым тыдні Вольгу Радзівонаву асудзілі на чатыры гады калоніі. Генпракуратура расказала, за што яна была асуджана.
19.12.2024 / 09:24
Генпракрутара паведамляе, што Вольга падрыхтавала і прадаставіла нямецкай штодзённай газеце «Die Tageszeitung» шэраг артыкулаў з выказваннямі, «накіраванымі на распальванне нацыянальнай і сацыяльнай варожасці, дыскрэдытацыю Рэспублікі, а таксама паклёп і абразы ў дачыненні да Лукашэнкі».
«Артыкулы Радзівонавай апублікаваныя ў вольным доступе для ўсеагульнага агляду на старонцы інтэрнэт-рэсурсу названай штодзённай газеты. На падставе прадстаўленых дзяржаўным абвінаваўцам доказаў Мінскі гарадскі суд пастанавіў абвінаваўчы прысуд. На падставе ч. 1 арт.130, ч. 1 арт. 368, арт. 369-1, ч. 2 арт. 367 Крымінальнага кодэкса Радзівонавай прызначана пакаранне — 4 гады са штрафам у памеры 100 базавых велічынь (4 тыс. рублёў). Адначасова з абвінавачанай спагнаны даход, атрыманы злачынным шляхам», — гаворыцца ў паведамленні Генпракуратуры.
Вольгу Радзівонаву затрымалі 7 сакавіка 2024 года.
Хворая маці Вольгі Радзівонавай, якой больш за 80 гадоў, мае патрэбу ў пастаянным доглядзе.
Вольга працавала да 2020 года ў KYKY.org, пераважна для рубрыкі «Боль», таксама супрацоўнічала ў якасці фрылансеркі з беларускімі і замежнымі медыя.