Eks-prezidenta ZŠA Biła Klintana špitalizavali ŭ Vašynhtonie
Bił Klintan, 78-hadovy były prezident ZŠA, jaki na praciahu mnohich hadoŭ sutykaŭsia z šeraham prablem sa zdaroŭjem, byŭ špitalizavany ŭ paniadziełak u Vašynhtonie paśla pavyšeńnia tempieratury, paviedamili ŭ jaho ofisie, piša «Hołas Amieryki».
24.12.2024 / 07:41
Bił Klintan. Fota: AP
«Prezident Klintan byŭ špitalizavany siońnia dniom (u paniadziełak) u miedycynski centr Džordžtaŭnskaha ŭniviersiteta dla praviadzieńnia abśledavańnia i nazirańnia paśla pavyšeńnia tempieratury», — napisaŭ namieśnik kiraŭnika aparata 78-hadovaha palityka Anchiel Ureńja ŭ sacyjalnaj sietcy X, dadaŭšy, što Klintan «zachoŭvaje badziory nastroj».
Raniej, u kastryčniku 2021 hoda, Klintan pravioŭ piać načej u balnicy z-za zaražeńnia kryvi.
U 2004 hodzie, va ŭzroście 58 hadoŭ, jon pieranios apieracyju pa šuntavańni čatyroch karanarnych arteryj paśla taho, jak daktary vyjavili prykmiety šyrokaha sardečna-sasudzistaha zachvorvańnia. Praz šeść hadoŭ jamu byli pastaŭlenyja stenty ŭ karanarnaj arteryi. Hety vypadak sa zdaroŭjem zaachvociŭ Klintana źmianić ład žyćcia, u tym liku pierajści na viehietaryjanskuju dyjetu, i z tych časoŭ jon nie raz publična raspaviadaŭ pra svajo zdaroŭje.
Apošni raz zdaroŭje Klintana pryciahvała ŭvahu ŚMI ŭ listapadzie 2022 hoda, kali jon zdaŭ stanoŭčy test na Covid-19. Tady jon paviedamiŭ, što simptomy byli «słabymi» i jon byŭ «udziačny za vakcynacyju i bustarnuju dozu».
Klintan, jaki zajmaŭ pasadu prezidenta dva terminy z 1993 pa 2001 hod, źjaŭlajecca druhim samym maładym z byłych prezidentaŭ ZŠA paśla 63-hadovaha Baraka Abamy.
Jon naradziŭsia ŭsiaho na niekalki miesiacaŭ paźniej inšaha byłoha prezidenta Džordža Buša-małodšaha i abranaha prezidenta Donalda Trampa.
Niahledziačy na toje, što jaho paśpiachovaje prezidenctva było azmročana skandałami, u apošnija dva dziesiacihodździ jon pryśviaciŭ siabie dypłamatyčnym i humanitarnym spravam, dasiahnuŭšy značnych pośpiechaŭ u hetych halinach.