Televizar źniščaje pamiać
Ježcie bolej ryby, razhadvajcie bolej kryžavanak i vyklučycie televizar, kali chočacie mieć lepšuju pamiać – vynikaje z aŭstralijskaha internet-daśledvańnia «Nacyjanalny test pamiaci».
31.08.2006 / 17:12
Ježcie bolej ryby, razhadvajcie bolej kryžavanak i vyklučycie televizar, kali chočacie mieć lepšuju pamiać – vynikaje z aŭstralijskaha internet-daśledvańnia «Nacyjanalny test pamiaci».
U daśledvańni pryniało ŭdzieł amal 30 tys. čałaviek padčas tydnia navuki ŭ Aŭstralii. Pry dapamozie testu spraŭdžvałasia, jak karystalniki internetu dajuć sabie rady z zapaminańniem śpisu pakupak, uzhadvańniem imionaŭ, tvaraŭ i prafesijaŭ, vyklikańniem uspaminaŭ ci znachodžańniem roźnicy pamiž zdymkami.
Udzielniki daśledvańnia taksama zapoŭnili apytalnik na temu roznych zvyčak, naprykład, spažyvańnia alkaholu, ahladańnia televizii i čytańnia.
Vyśvietliłasia, što najvažniejšym čyńnikam, što vyznačyŭ vynik testu, było ahladańnie televizii. Karystalniki internetu, jakija hladziać televizar u dzień mienš za hadzinu, lepiej za telemańjakaŭ dali sabie rady ŭva ŭsich zadańniach, źviazanych z pamiaćciu.
Na horšyja vyniki testu paŭpłyvała taksama štodzionnaje spažyvańnie vialikaj kolkaści alkaholu, taksama paćvierdziłasia suviaź dobraj pamiaci z čytańniem apovieściaŭ.
Tyja, chto razhadvaje kryžavanki, lepš zapaminajuć śpisy pakupak i pryhadvajuć imiony, a spažyvańnie ryby raz na tydzień papraŭlaje zdolnaść zapaminać śpisy pakupak – vynikaje z daśledvańnia.
Žančyna i mužčyny mieli takija samyja vyniki ŭva ŭsich zadańniach.
Važnym dla pamiaci źjaŭlajecca zdaroŭje ŭ jaho šyrokim razumieńni – fizyčnaje i psychičnaje, dyjeta i aktyŭny styl žyćcia – padkreśliła adna z kiraŭnikoŭ daśledvańnia, neŭrapsycholah z universytetu ŭ aŭstralijskim štacie Kvinsłend Nensi Pečana.
Ekspert padkreśliła, što dla pamiaci karysnaja razumovaja aktyŭnaść. «Televizija – nie błahaja reč, ale jana adbiraje čas, jaki b možna było pryśviacić na vykanańnie čahości, što patrabuje ad mozhu krychu bolšaha vysiłku. Televizija moža być pasyŭnaj dziejnaściu, u toj čas, kali čytańnie vymahaje aktyŭnaści, što našmat lepš» – patłumačyła jana.
Navukoŭcy papiaredzili, što test syhnalizuje pra peŭnyja zakanamernaści na temu čałaviečaj pamiaci, adnak ź internet-daśledvańniem zaŭsiody źviazanaja ryzyka niesurjoznaha ci niadobrasumlennaha padychodu jaho ŭdzielnikaŭ.