Латушка назваў сваю самую вялікую паразу на пасадзе міністра культуры
«Паслалі не толькі міністра культуры, але яшчэ і двух віцэ-прэм'ераў».
30.12.2024 / 11:50
Павел Латушка. Фота: Офіс Ціханоўскай
Павел Латушка ў эфіры ютуб-праграмы «Обычное утро» заўважыў, што Лукашэнка ніколі не разумеў важнасць аховы гісторыка-культурнай спадчыны. А сваёй самай вялікай паразай былы міністр культуры лічыць знос першай гарадской электрастанцыі ў Мінску каля Парка Горкага.
«Колькі за яе было вайны. Я лічу сваёй самай вялікай паразай, што мне не атрымалася яе адстаяць. (…) Хаця [бізнэсмен Юрый] Чыж і абяцаў аднавіць фасад яе. Спецыяльна быў выразаны ўвесь фасад, разрэзаны на квадраты. Яго звезлі на склад. І ён [Чыж] абяцаў, што гэта адновіць.
Сідорскі туды прыязджаў, казаў: «Што вы мне тут расказваеце, што гэта за помнік гісторыі і культуры?»
Я кажу: «Сяргей Сяргеевіч, гэта ж готыка!» — «Якая, *** готыка?!»
Латушка заўважае, што ў свой час ён з двума віцэ-прэм'ерамі спрабаваў адстаяць будынак электрастанцыі ў прэм'ер-міністра Сяргея Сідорскага, але ён іх выгнаў з кабінета.
«Проста на тры літары выставіў. Я выйшаў на калідор каля кабінета прэм'ера і кажу: «Вы ведаеце, калегі, што адно мяне парадавала пасля сустрэчы з прэм'ер-міністрам? Что нах** паслалі не толькі міністра культуры, але яшчэ і двух віцэ-прэм'ераў».
Нагадаем, што ў сакавіку 2011 года будынак першай гарадской электрастанцыі ў Мінску быў цалкам зруйнаваны дзеля пабудовы на гэтым месцы адміністрацыйнага будынка, які першапачаткова заявілі як гатэль «Кемпінскі». У выніку будоўля зацягнулася, ад гатэля адмовіліся, а будынак выкупіў Збер Банк пад офісы.
Так цяпер выглядае фрагмент былой электрастанцыі. Фота: Павел Русак / Tochka.by
Работы па аднаўленні фасада былі завершаны ў канцы 2022 года. Тое, як рэалізавалі праект, выклікала неадназначную ацэнку спецыялістаў у галіне аховы спадчыны.
Першапачатковы план «рэканструкцыі» электрастанцыі. Фота: koko_by/telegram
Архітэктар Вадзім Гліннік: Мінск страчвае сваё гістарычнае аблічча