Pijaniera biełaruskaha internetu Uładzimira «Elefant» Nieŭmiaržyckaha sudziać za zhvałtavańnie dziciaci
Nieŭmiaržycki viadomy jak stvaralnik prajekta «Minski słon» i dyrektar dziciačaj stamatałohii.
09.01.2025 / 10:25
Uładzimir Nieŭmiaržycki. Fota: onliner.by
Uładzimiru Nieŭmiaržyckamu 52 hady. Rodam jon z Rasii, z horada Sierhijeŭ Pasad, ale amal usio žyćcio pražyŭ u Biełarusi. U 1995 hodzie padaŭ prašeńnie i atrymaŭ hramadzianstva našaj krainy.
Nieŭmiaržycki viadomy jak adzin ź pieršych aktyŭnych karystalnikaŭ sieciva. Pryčym jašče da internetu jon byŭ viadomy ŭ biełaruskim Fidonetje (niekamiercyjnaja sietka, papularnaja da taho, jak internet zavajavaŭ śviet) pad niknejmam Elefant, jakim karystajecca ŭsio žyćcio.
U 1999 hodzie jon stvaryŭ prajekt «Minski słon». Heta byŭ adzin ź pieršych biełaruskich forumaŭ. Jon praisnavaŭ amal 20 hadoŭ, ale pik papularnaści pryjšoŭsia na nulavyja hady.
Tak vyhladaŭ «Minski słon» u 1999 hodzie. Fota: web.archive.org
Na sajcie raźmiaščalisia naviny, afišy, ahlady kino i śpiektaklaŭ, pravodzilisia konkursy, byli aŭtarskija kałonki. Na «Minskim słanie» byli sotni aktyŭnych karystalnikaŭ, što dla Biełarusi 1999 hoda było vielmi šmat (dostup u internet źjaviŭsia ŭ Biełarusi ŭ 1997 hodzie, a veb-sajtaŭ byli adzinki).
Taksama Nieŭmiaržycki maje biznes — stamatałahičnuju kliniku «Elefancik», najpierš aryjentavanuju na dziaciej. Žonka Nieŭmiaržyckaha pracuje tam stamatołaham.
U mai 2024 pierastaŭ abnaŭlacca instahram Uładzimira, jak i inšyja sacsietki. U miesiendžarach jon niedastupny.
9 studzienia 2025 hoda Nieŭmiaržyckaha pačali sudzić za «hvałtoŭnyja dziejańni seksualnaha charaktaru ŭ adnosinach da zaviedama niepaŭnaletniaj». Za heta jamu pahražaje ad vaśmi da piatnaccaci hadoŭ kałonii. Abstaviny spravy nieviadomyja, praces adbyvajecca ŭ zakrytym režymie.
«Chałaściak biez vyšejšaj adukacyi». U Biełarusi vyznačyli partret typovaha piedafiła
Asudžanaha za piedafiliju eks-režysiora «Jerałaša» vyzvalili ad pakarańnia. Jon vajuje va Ukrainie