Novy ministr unutranych spraŭ Litvy Kandratovič: Kulturna samaja blizkaja kraina dla Litvy — heta, viadoma, Biełaruś
U kancy 2024 hoda ŭ Litvie pačaŭ pracu novy ŭrad, u jakim adnu z klučavych pasad zaniaŭ palityk-technakrat Uładzisłaŭ Kandratovič, jaki vałodaje ŭ tym liku biełaruskaj movaj. U svaim pieršym vialikim intervju jon raspavioŭ pra płany ŭ mihracyjnaj palitycy i pohlady na nacyjanalnuju biaśpieku krainy.
12.01.2025 / 16:49
Ministr MUS Litvy Uładzisłaŭ Kandratovič. Skrynšot videa
Intervju ź ministram apublikavaŭ YouTube-kanał «Nastojaŝieje vriemia»
Ahulnaja historyja i blizkaść Litvy i Biełarusi
Adnoj ź pieršych tem stała ekanamičnaja mihracyja ź Biełarusi. Pavodle Kandratoviča, Litva i Biełaruś źviazany doŭhaj supolnaj historyjaj i ciesnymi kulturnymi suviaziami.
«Kulturna samaja blizkaja kraina dla Litvy — heta, viadoma, Biełaruś. Ahulnaja historyja, ahulnaja kultura, — padkreśliŭ novy ministr. — Rodnasnyja suviazi vielmi vialikija, bo ŭ mnohich hramadzian Litvy jość svajaki ŭ Biełarusi. Tak histaryčna skłałasia, takaja šmatviakovaja historyja».
Razam z tym ministr adznačyŭ nieabchodnaść uličvać i mahčymyja ryzyki dla biaśpieki dziaržavy. Pa jaho słovach, hałoŭny pryjarytet — «stabilnaść krainy». Tolki paśla analizu ŭsich faktaraŭ śpiecsłužbami možna prymać dalejšyja rašeńni.
Pajezdki rasijan i biełarusaŭ na radzimu: ryzyka ci nie?
Kandratovič taksama zakranuŭ dyskusiju pra častyja pajezdki hramadzian Rasii i Biełarusi na radzimu.
«Šmat u čym usio zaležyć ad taho, ci zmožam my kiravać hetymi pracesami, — patłumačyŭ jon. — Jość vypadki, kali ŭładalniki humanitarnych viz i VNŽ časta naviedvajuć radzimu. Słužby, jakija ličać heta ryzykaj, majuć padstavy tak dumać».
Jon padkreśliŭ, što ŭ hetym pytańni «pieršaja rola naležyć śpiecsłužbam, druhaja — [MUS]».
Ruskaja mova ŭ Departamiencie mihracyi
Asobna ministr adkazaŭ na pytańnie pra vykarystańnie ruskaj movy pry zdačy ekzamienu na vadzicielskija pravy ŭ Litvie. Jaho papiarednica Ahnie Biłatajcie vystupała za poŭnuju admovu ad pasłuh na ruskaj movie, nazyvajučy jaje «movaj krainy-akupanta». Kandratovič zaniaŭ bolš uzvažanuju pazicyju.
«Inakš ja nie razumieju, jak moža funkcyjanavać mihracyjny departamient. Pry pieršym zvarocie, kali ŭ ludziej niama ahulnaj z nami movy, treba znachodzić sposaby kamunikacyi. Ja nie baču nijakich prablem u tym, što Departamient mihracyi pracuje i na ruskaj. My nie źbirajemsia źmianiać isnujučuju praktyku».