Polšča nie dała słavackaj delehacyi dazvoł na pralot u Maskvu. Tyja lacieli ŭ abchod
13.01.2025 / 9:7
Polšča nie dała dazvoł na pralot praz svaju pavietranuju prastoru samalotu słavackaj parłamienckaj delehacyi, jakaja nakiroŭvałasia na sustreču ŭ Maskvu. Deputatam pryjšłosia lacieć praz Čechiju i Niamieččynu. Polski bok patłumačyŭ rašeńnie niedachopam papier u zajaŭcy słavakaŭ na palot.
Andrej Danko i kiraŭnik MZS Rasii Siarhiej Łaŭroŭ na sustrečy ŭ Sočy, 13 lutaha 2019 hoda. Fota: MZS RF
Vice-śpikier Nacyjanalnaj rady Andrej Danko, jaki byŭ u składzie delehacyi, što prylacieła ŭ Rasiju, aburyŭsia polskim bokam.
«Ja nie razumieju takoha padychodu, ale heta realnaść, ź jakoj treba źmirycca», — prakamientavaŭ Danko rašeńnie polskich uładaŭ.
U MZS Polščy abvierhli abvinavačańni, tam kažuć, što zabarony nie było, a była kiepskaja arhanizacyja palotu sa słavackaha boku.
«My nie admovili słavackamu boku ŭ palocie, jany dasłali nam niapoŭnyja dakumienty, biez noty, a potym, padčas razhladu spravy — kali ich paprasili dapoŭnić — paviedamili nam ab źmienie maršrutu», — zajaviŭ PAP pres-sakratar MZS Pavieł Uroński.
U składzie słavackaj delehacyi znachodziacca dva vice-śpikiery parłamienta — Andrej Danko i Tybar Hašpar, a taksama niekalki deputataŭ.
Asnoŭnaja meta ich vizitu — abmierkavańnie praciahu pastavak rasijskaha hazu ŭ Słavakiju i pierśpiektyŭ mirnaha ŭrehulavańnia rasijska-ŭkrainskaha vajennaha kanfliktu.
Raniej Andrej Danko adznačyŭ, što premjer-ministr Słavakii Robiert Fica pačaŭ dyjałoh z Rasijaj padčas svajho vizitu ŭ Maskvu ŭ śniežni minułaha hoda. Ciapier Słavakija maje namier raźvivać adnosiny z Rasijaj na ŭzroŭni parłamienta.
Viartańnie delehacyi Słavakii z Rasii zapłanavana na 15 studzienia.