Aŭtuchovič: Asipienku i Lavonavu abiacali svabodu za pakazańni suprać mianie
onłajn +foty
Sud nad Mikałajem Aŭtuchovičam i Uładzimiram Asipienkam praciahniecca 16 sakavika. Da hetaha času abvinavačanyja buduć praciahvać znajomicca z materyjałami spravy.
10.03.2010 / 10:36
Siońnia ŭ Viarchoŭnym sudzie Biełarusi pačaŭsia praces pa spravie vaŭkavyskich pradprymalnikaŭ Mikałaja Aŭtuchoviča i Uładzimira Asipienki.
12:15
Sudździa abviaściŭ pierapynak da 16 sakavika (aŭtorak). Praces adnovicca a 10-j hadzinie ranicy.
Było zadavolena chadajnictva Aŭtuchoviča ab dadatkovym aznajamleńni z materyjałami spravami, ale što da kapiravańnia materyjałaŭ, to sudździa zajaviŭ "pa mahčymaści".
Chadajnictva ab pryciahnieńni Kamaroŭskaha i Voŭčaka ŭ jakaści abaroncaŭ adchilena. Sudździa zajaviŭ, što siońniašnija abaroncy Aŭtuchoviča i Asipienki dastatkova kvalifikavanyja advakaty.
Taksama budzie nakiravany zapyt u prakuraturu nakont pramocnaści dziejańniaŭ supracoŭnikaŭ upraŭleńnia pa baraćbie z arhanizavanaj złačynnaściu.
11:27
Aŭtuchovič i Asipienka ŭ zali suda.
Mikałaj Aŭtuchovič.
Paciarpiełyja. Namieśnik ministra pa padatkach i zborach Vasil Kamianko (sprava).
Afhancy Voŭčak i Kamaroŭski.
Alaksandr Łaryn.
Šmat ludziej nia zdoleli patrapić u zalu suda z-za adsutnaści volnych miescaŭ.
Abvieščany pierapynak, sudździa razhladaje chadajnictvy.
11:15
Mikałaj Aŭtuchovič zajaviŭ ab zapałochvańniach, psichałahičnym cisku na jaho padčas śledstva. Kazaŭ, što Lavonavu i Asipienku prapanoŭvali davać pakazańni suprać jaho, uzamien abiacali svabodu. Tak, Lavonavu, pa słovach Aŭtuchoviča, kazali, što kali jon nie daść pakazańniaŭ, to jaho "začyniać na vialiki termin". A Asipienku, kali daść pakazańni, adpuściać na viasielle dački, skazaŭ Aŭtuchovič.
Mikałaj Aŭtuchovič taksama zajaviŭ, što pa spravie byli zatrymanyja kala dziasiatka čałaviek,
a aznajamleńnie z materyjałami śledstva prachodziła ŭ nialudskich umovach, pry tempieratury 0 hradusaŭ.
M. Aŭtuchovič kaža, što navat advakaty siadzieli ŭ kurtkach.
Padčas rasśledavańnia hetaj spravy praz turmu prajšło bolš za dziesiać čałaviek. Na ŭsich ich, pa słovach Aŭtuchoviča, akazvaŭsia psichałahičny cisk.
Ciapier Aŭtuchovič zajaviŭ chadajnictva, kab jamu byli vydadzienyja kopii materyjałaŭ spravy dla dadatkovaha aznajamleńnia, a taksama, kab praces byŭ razhledžany u Minskim haradskim sudzie ci Hrodzienskim abłasnym, kab była mahčymaść abskardzić rašeńnie.
Zajaviŭ ab udziele ŭ spravie ŭ jakaści abaroncaŭ Alaksandra Kamaroŭskaha i Aleha Voŭčaka.
Alaksandr Łaryn - sam jon z horada Nalčyk - siadzić u kiepcy. 1973 hoda naradžeńnia. Žanaty, dvoje dziaciej. Sudzimy ŭ Rasii za kradziažy. Asudžany byŭ na piać hadoŭ z adterminoŭkaj na try hady. Zatrymany byŭ raniej za Aŭtuchoviča 31 studzienia 2009 hoda.
***
10:17
Pačaŭsia sud. Pasiadžeńnie viadzie sudździa Alaksiej Ciaciuchin, prakuror - Safaraŭ. Videa- i fotazdymku zabaranili, bo suprać vykazaŭsia adzin z padsudnych - Alaksandr Łaryn.
9:59
Źjavilisia dvoje paciarpiełych - heta milicyjaniery Kacuba i Mandzik. Zalu achoŭvajuć siem milicyjanieraŭ u zali i dva śpiecnazaŭcy. Sama sudovaja zała raźličana na 50 čałaviek.
9:52
U zali pasiadžeńniaŭ 30-40 čałaviek, pryjšli hienierał Valeryj Frałoŭ, pravaabaronca Aleh Voŭčak, Enira Branickaja, Siarhiej Parsiukievič, hramadski dziejač Viačasłaŭ Siŭčyk, Pavieł Sieviaryniec dy inš.
Na łavie padsudnych Mikałaj Aŭtuchovič, Uładzimir Asipienka, a taksama Alaksandr Łaryn i Michaił Kazłoŭ, jakija taksama prachodzić pa spravie.
Fotažurnalistam pakul dazvalajuć zdymać. U zali prysutničajuć žurnalisty dziaržych ŚMI -- STV, BT, BIEŁTA. A taksama pradstaŭniki ABSIE.
***
Praces pačniecca ŭ 10.00 u adkrytym režymie, adnak kali adzin z bakoŭ zajavić chadajnictva ab praviadzieńni pasiadžeńnia ŭ zakrytym režymie, sudździa moža jaho zadavolić.
***
Vaŭkavyskija pradprymalniki Mikałaj Aŭtuchovič, Juryj Lavonaŭ i Uładzimir Asipienka byli zatrymany 8 lutaha 2009 hoda.
Praz 10 dzion im pradjavili abvinavačańnie pa art. 218 Kryminalnaha kodeksa (naŭmysnaje źniščeńnie albo paškodžańnie majomaści).
20 listapada Asipienku i Aŭtuchoviču było pradjaŭlena abvinavačańnie ŭ padrychtoŭcy terarystyčnaha akta.
Lavonava ŭ pačatku žniŭnia vyzvalili z‑pad varty, a 24 vieraśnia ź jaho byli źniaty ŭsie abvinavačańni.
U studzieni 2010 hoda mižnarodnaja pravaabarončaja arhanizacyja Human Rights Watch pryznała, što vaŭkavyskija pradprymalniki byli aryštavany pa palityčna matyvavanych spravach.
Biełaruskija pravaabaroncy źviartajuć uvahu na toje, što raniej Aŭtuchovič i Lavonaŭ užo byli sudzimyja i pryznanyja mižnarodnaj supolnaściu viaźniami sumleńnia.
6 studzienia, pradstaŭlajučy žurnalistam u Minsku chroniku parušeńniaŭ pravoŭ čałavieka ŭ 2009 hodzie, kiraŭnik arhanizacyi «Pravaabarončy aljans» (Litva) Ludmiła Hraznova nazvała Aŭtuchoviča i Asipienku «simvaličnymi achviarami» biełaruskaj ułady.
Pavodle jaje słoŭ, tradycyjna ŭ Biełarusi zastajucca dva‑try źniavolenyja pa palityčnych matyvach, jakija abo znachodziacca praciahły čas u śledčym izalatary, abo adbyvajuć termin źniavoleńnia ŭ kałonii.
«Kali raniej takija ludzi adnaznačna aryštoŭvalisia pa «palityčnych» artykułach Kryminalnaha kodeksa, to ciapier nazirajecca niekatoraja «mimikryja»: ułady havorać ab tym, što Aŭtuchovič i Asipienka siadziać za padrychtoŭku terarystyčnaha akta ŭ dačynieńni da staršyni Hrodzienskaha abłvykankama Uładzimira Saŭčanki i namieśnika ministra pa padatkach i zborach Vasila Kamienki. Tym nie mienš pravaabaroncy ličać ich palityčnymi źniavolenymi», — padkreśliła Hraznova.
Jana ličyć, što heta «pavučalnyja aryšty i simvaličnyja achviary, jakija ŭłada prynosić štohod dla taho, kab hramadzianskaja supolnaść i palityčnaja apazicyja adčuvali psichałahičnyja stresy i nie prajaŭlali toj aktyŭnaści, jakuju mahli b prajavić».