Śmierć na rejkach u Zasłaŭi
Pa fakcie zdareńnia 16 sakavika na stancyi «Biełaruś» pravodzicca pravierka.
17.03.2010 / 19:10
Pa fakcie zdareńnia 16 sakavika na stancyi «Biełaruś» pravodzicca pravierka.
Pozna ŭviečary 16 sakavika pasažyry elektryčak, jakija vychodzili na stancyi «Biełaruś», što ŭ Zasłaŭi, mahli nazirać nastupnuju karcinu: milicyjanty ahladali cieła mužčyny na rejkach adnaho z šlachoŭ. Cieła niabožčyka lažała ŭ nienaturalnaj pozie, tvar byŭ u kryvi.
U Zasłaŭskim HAUS paviedamili, što supracoŭniki adździełu nie vyjazdžali ŭviečary 16 sakavika na vyklik u rajon čyhunačnaj stancyi, i paraili źviarnucca ŭ transpartnuju milicyju Minskaha rajona. Tam paćvierdzili, što incydent na stancyi «Biełaruś» 16 sakavika mieŭ miesca, ale admovilisia paviedamić choć jakija-niebudź padrabiaznaści. «Pravodzicca pravierka», — byŭ adkaz.
Zdareńni na čyhuncy niaredkija. Čaściej za ŭsio jany adbyvajucca pa pryčynie niaŭvažlivaści piešachodaŭ, a taksama vinoj trahiedyj časta byvaje ałkahol. Apošni incydent na čyhuncy u maładziečanskim nakirunku zdaryŭsia ŭ apošni dzień lutaha. Pozna ŭviečary pasažyrski ciahnik «Minsk-Połack» na pierahonie Maładziečna-Vilejka niedaloka ad Sasnovaha Boru źbiŭ niećviarozaha 21-hadovaha chłopca jaki zasnuŭ na rejkach. Małady čałaviek naradziŭsia ŭ kašuli, bo zastaŭsia žyvy. A voś dla 52-hadovaha mužčyny sustreča ź ciahnikom elektryčki ŭ Maładziečnie 19 lutaha skončyłasia fatalna.