Буйная авіякатастрофа ў Пакістане
На борце лайнера, які разбіўся ў гарах, знаходзілася 152 чалавекі.
28.07.2010 / 10:01
Пасажырскі самалёт, на борце якога знаходзіліся больш за 150 чалавек, разбіўся непадалёк ад пакістанскай сталіцы Ісламабад раніцай у сераду, паведамляе Reuters са спасылкай пакістанскае агенцтва грамадзянскай авіяцыі.
Па папярэдніх дадзеных, на борце знаходзіліся 146 пасажыраў і шэсць членаў экіпажа. Самалёт ляцеў з Турцыі праз Карачы ў Ісламабад.
Крыніца ў агенцтве грамадзянскай авіяцыі паведамляе, што сувязь з бортам знікла каля пятай гадзіны раніцы, неўзабаве пасля вылету лайнера з аэрапорта Карачы на поўдні краіны. Самалёт павінен быў прызямліцца ў Ісламабадзе і паспеў звязацца з дыспетчарам міжнароднага аэрапорта пакістанскай сталіцы. У момант падзення самалёта быў моцны лівень, а над зямлёй сцяліўся туман. Відавочцы катастрофы паведамляюць, што за некалькі хвілін да падзення лайнер ляцеў на незвычайна малой вышыні.
Папярэдняя інфармацыя аб ацалелых у катастрофе не падцвердзілася. Улады паведамляюць, што знойдзеныя парэшткі ўсіх загінулых
Дажджы ў Ісламабадзе льюць ўжо другія суткі. Ужо існуе версія, што пілоты маглі раней звычайнага пачаць заход на пасадку праз складаныя ўмовы надвор’я. Таксама адпрацоўваецца версія тэракту на борце.
Airblue — адносная новая пакістанская авіякампанія, якая з’явілася толькі ў 2003 годзе. Яе парк складаюць сучасныя лайнеры — Airbus A320, Airbus A321. База знаходзіцца ў Міжнародным аэрапорце Карачы. Авіякампанія прапануе пасажырам як унутраныя рэйсы, так і міжнародныя. Пазіцыянуе сябе як бюджэтная авіякампанія.