Praca pa akcyjanavańni «Biełaruśkałija» znachodzicca na zaviaršalnym etapie

Pra heta paviedamiŭ na pres-kanfierencyi 28 lipienia namieśnik dyrektara Fondu dziaržaŭnaj majomaści Dziaržkammajomaści Uładzimir Kavaleŭski.

28.07.2010 / 13:35

pra heta paviedamiŭ na pres-kanfierencyi 28 lipienia namieśnik dyrektara Fondu dziaržaŭnaj majomaści Dziaržkammajomaści Uładzimir Kavaleŭski.

Pavodle jaho słoŭ, zastałosia pryniać rašeńnie halinovaj kamisii i kamisii pa pryvatyzacyi i vydać zahad ab akcyjanavańni «Biełaruśkałija».

Kavaleŭski nahadaŭ, što pry akcyjanavańni pradpryjemstva 100% akcyj budzie naležać dziaržavie.

Taksama jon adznačyŭ, što ŭ pracesie refarmavańnia nie budzie pravodzicca lhotny prodaž akcyj rabotnikam pradpryjemstva i pryraŭnavanym da ich asobam i abmienu na čeki «Majomaść». «My akumulujem 100-pracentny pakiet akcyj, kab potym akcyi možna było prapanavać na dastatkova cikavych umovach inviestaru», — adznačyŭ Kavaleŭski. Pry hetym «na ciapierašnim etapie pytańnie ab doli pakieta i jaho košcie dla prodažu inviestaru dačasnaje».

Praces prodažu budzie razhladacca abo šlacham pramych pieramoŭ z patencyjalnym inviestaram, abo na konkursnaj asnovie, adznačyŭ Kavaleŭski.

«Taki značny abjekt, jak „Biełaruśkalij“, patrabuje dakładnaj padrychtoŭki, asablivaha kompleksnaha padychodu, i kali i budzie ažyćcioŭleny prodaž pakieta akcyj, to jaho pamier budzie razhledžany ŭsiebakova i z ulikam intaresu dziaržavy», — padkreśliŭ Kavaleŭski.

Raniej pieršy vice-premjer Uładzimir Siamaška zajaviŭ, što Biełaruś nie maje namieru pradavać ni kantrolny, ni błakirujučy pakiet akcyj «Biełaruśkałija». «Heta vielmi značny aktyŭ, my im raskidvacca nie majem namieru», — zajaviŭ Siamaška 30 červienia ŭ parłamiencie. Razam z tym, adznačyŭ jon, Biełaruś hatova pradać kala 20% akcyj pradpryjemstva prykładna za 6–7 młrd. dołaraŭ.