«Małady front» anansuje kampaniju «Sychodź!»

U vypadku rehistracyi Łukašenki kandydatam MF zładzić Płošču.

20.09.2010 / 11:45

Mižnarodnaje maładziožnaje abjadnańnie «Małady front» (Čechija) biare na siabie adkaznaść za arhanizacyju kampanii pratestu ŭ vypadku falsifikacyi vynikaŭ prezidenckich vybaraŭ u Biełarusi. Pra heta paviedamiŭ lidar arhanizacyi Źmicier Daškievič.

Pavodle jaho słoŭ, takoje rašeńnie było pryniata na pasiadžeńni sojma «Maładoha frontu», jakoje prajšło 19 vieraśnia ŭ Minsku.

«Pa-pieršaje, my zajaŭlajem pra toje, što ni refierendum ab źmienie Kanstytucyi 1996 hoda, ni refierendum 2004 hoda, na jakim było pryniata rašeńnie ab tym, što prezident moža zastavacca na svajoj pasadzie bolš za dva razy, nie źjaŭlajucca lehitymnymi. Ich nie pryznała mižnarodnaja supolnaść, vyniki volevyjaŭleńnia naroda byli falsifikavany. Tamu «Małady front» zajaŭlaje pra toje, što Alaksandr Łukašenka nie moža bałatavacca na post prezidenta Biełarusi. Heta budzie parušeńniem zakonu», — skazaŭ Daškievič.

Tamu, praciahnuŭ jon, «Małady front» pačynaje hramadzianskuju kampaniju «Sychodź!». Jaje meta, pavodle słoŭ Daškieviča, — danieści da hramadstva infarmacyju ab tym, što «rehistracyja Alaksandra Łukašenka ŭ jakaści kandydata ŭ prezidenty niezakonnaja».

Kampanija «Sychodź!» praduhledžvaje razdaču infarmacyjnych materyjałaŭ, roznyja akcyi, fłešmoby i chepieninhi. «Kali Łukašenka budzie zarehistravany kandydatam u prezidenty, a demakratyčnyja kandydaty atrymajuć admovu ŭ rehistracyi, «Małady front» biare na siabie adkaznaść za praviadzieńnie kampanii bajkotu vybaraŭ i za arhanizacyju kampanii pratestu ŭ vypadku falsifikacyi vynikaŭ vybaraŭ prezidenta na Kastryčnickaj płoščy Minska 19 śniežnia 2010 hoda», — zajaviŭ Daškievič.