У Пружанскім раёне ўпаў мотадэльтаплан

24.09.2010 / 11:04

У Пружанскім раёне ў выніку падзення дэльтаплана 26-гадовы пілот атрымаў цялесныя пашкоджанні.

Як паведаміў намеснік брэсцкага транспартнага пракурора Віктар Строк, аварыя адбылася каля 9 раніцы 23 верасня недалёка ад вёскі Вялікія Якавічы.

Мотадэльтаплан Т-2 М, які належыць ТАА «Пружаны Авіяхімсервіс» і якім кіраваў 26-гадовы жыхар Віцебска, упаў пры ўзлёце прыкладна за 30 метраў ад узлётна-пасадачнай паласы падчас вучэбна-трэніровачнага палёту.

Мужчына праходзіў практычны курс навучання пілатаванню дэльталётамі на прадпрыемстве «Пружаны Авіяхімсервіс». У гэты дзень ён завяршаў яго.

Дэльтапланерыст упаў з вышыні прыкладна 10–15 метраў.

З пераломам нагі і ўдарамі ён змешчаны ў Пружанскую цэнтральную бальніцу.

Праверку па дадзеным факце праводзіць следчы аддзел Беларускай транспартнай пракуратуры.