Rašeńnie ZŠA ab sankcyjach budzie zaležać ad prahresu ŭ sfiery demakratyi
Pra heta zajaviŭ časovy pavierany ŭ spravach ZŠA Majkł Skenłan 5 listapada, vystupajučy na XIII Minskim forumie.
05.11.2010 / 14:22
Rašeńnie ZŠA ab sankcyjach ŭ adnosinach da Biełarusi budzie zaležać ad prahresu biełaruskaj ułady ŭ sfiery demakratyi, vykanańnia pravoŭ čałavieka i viaršenstva zakona. Pra heta zajaviŭ časovy pavierany ŭ spravach ZŠA Majkł Skenłan 5 listapada, vystupajučy na XIII Minskim forumie.
«ZŠA hatovyja da supracoŭnictva na asnovie demakratyčnych pryncypaŭ. Palapšeńnie situacyi ŭ hetych pytańniach važnaje dla našaha dyjałohu i budzie ŭpłyvać na naša rašeńnie ab sankcyjach», — padkreśliŭ Skenłan.
Amierykanski dypłamat zaznačyŭ, što śniežańskija prezidenckija vybary buduć «vydatnym šancam dla biełaruskaha ŭrada pakazać, što jon hatovy pryniać i vykonvać mižnarodnyja standarty i normy».
ZŠA spadziajucca, padkreśliŭ Skenłan, što ŭsie kandydaty atrymajuć svabodny dostup da ŚMI, buduć praviedzienyja adkrytyja debaty, a naziralniki buduć mieć mahčymaść bieśpieraškodna ažyćciaŭlać svaje funkcyi, u tym liku ŭ častcy nazirańnia za padlikam hałasoŭ.
«My čakajem, što ŭ Biełarusi hetyja pracesy buduć prachodzić u adpaviednaści z demakratyčnymi normami. Dla nas bolš važna heta, a nie vynik vybaraŭ», — skazaŭ amierykanski dypłamat.
Skenłan taksama paviedamiŭ, što pytańnie ab sankcyjach u adnosinach da Biełarusi i ich praciahu
zaraz abmiarkoŭvajecca ŭ Vašynhtonie. Rašeńnie pavinna być vyniesienaje ŭ druhoj pałovie listapada.
U svaju čarhu, namieśnik načalnika ŭpraŭleńnia źniešniepalityčnaha analizu MZS Andrej Šuplak, vystupajučy na forumie, zajaviŭ, što Biełaruś zacikaŭlena ŭ narmalnych adnosinach sa Złučanymi Štatami. «Dziejańnie adnabakovych sankcyj, uviedzienych ZŠA, źjaŭlajecca hałoŭnaj pieraškodaj na šlachu našaha ŭzajemadziejańnia. Ich admiena adkryje novyja mahčymaści ŭ raźvićci našych adnosinaŭ», — skazaŭ jon.
ZŠA prymianiajuć suprać Biełarusi dva vidy sankcyj. Vizavyja i finansavyja abmiežavańni ŭ dačynieńni da vyšejšych biełaruskich dziaržčynoŭnikaŭ byli ŭviedzienyja paśla prezidenckich vybaraŭ 2006 hoda, pryznanych mižnarodnaj supolnaściu niedemakratyčnymi. Hetyja sankcyi prezident ZŠA Barak Abama ŭ červieni 2010 hoda praciahnuŭ jašče na hod.
Aprača taho, u kancy 2007 hoda Vašynhton pačaŭ vykarystoŭvać u adnosinach da Minska miery ekanamičnaha ŭździejańnia. Byli ŭviedzienyja sankcyi ŭ adnosinach da dziaržaŭnaha kancerna «Biełnaftachim» i niekatorych pradpryjemstvaŭ, što ŭvachodziać u jaho. Pryčynaj taksama pasłužyła adsutnaść demakratyčnych pieraŭtvareńniaŭ u Biełarusi.
Zaraz hetyja sankcyi častkova prypynienyja. Adnak u 2008 hodzie jany stali pryčynaj surjoznaha dypłamatyčnaha kanfliktu pamiž Biełarussiu i ZŠA, kali baki adklikali pasłoŭ dla kansultacyj i značna skaracili kolkaść supracoŭnikaŭ dyppradstaŭnictvaŭ. Paŭnacennaja dziejnaść pasolstvaŭ nie adnoŭlena dahetul.