Дзясяткі беларусаў абраныя ў рады на Беласточчыне
У муніцыпальных выбарах у Польшчы на Беласточчыне ў раённыя і гарадзкія рады прайшлі дзясяткі беларусаў. А ўвогуле ў Польшчы вынікі выбараў пацьвердзілі існуючы ў грамадзтве выразны падзел на прыхільнікаў кіраўнічай партыі і апазыцыі.
16.11.2006 / 12:24
У муніцыпальных выбарах у Польшчы на Беласточчыне ў раённыя і гарадзкія рады прайшлі дзясяткі беларусаў. А ўвогуле ў Польшчы вынікі выбараў пацьвердзілі існуючы ў грамадзтве выразны падзел на прыхільнікаў кіраўнічай партыі і апазыцыі.
У Бельску-Падляскім ад Бельскай кааліцыі ў гарадзкую раду прайшлі 7 чалавек, сярод іх вядомыя беларускія актывісты Андрэй Сьцепанюк і Дарафей Фіёнік. У другі тур выбараў мэра гэтага гораду выйшаў беларус Пётар Божка. Другі тур будзе таксама ў населенай пераважна беларусамі Орлі. У радзе Гайнаўкі ад Беларускага выбарчага камітэту дэпутатамі сталі шэсьць беларусаў.
У Беластоку кандыдаты ад Беларускага выбарчага камітэту ня трапілі ані ў гарадзкую раду, ані ў раду (сэймік) Падляскага ваяводзтва. Беларусы там, аднак, ёсьць, напрыклад, Ян Сычэўскі – старшыня Беларускага грамадзка-культурнага таварыства, але ён балятаваўся ад блёку «Левыя і дэмакраты».
Увогуле, адназначна назваць пераможцу муніцыпальных выбараў у Польшчы цяжка, бо кіраўнічая партыя «Права і справядлівасьць» перамагла пераважна ў невялікіх гарадох і на вёсцы, а апазыцыйная лібэральная «Грамадзянская плятформа» – у вялікіх гарадох.
Кандыдаты ад гэтых дзьвюх партыяў сустрэнуцца ў другім туры выбараў, прыкладам, у Варшаве, дзе барацьба за пост мэра найбольш вострая.
У Польшчы мясцовыя ўлады маюць вялікія паўнамоцтвы і незалежнасьць ад цэнтру, таму муніцыпальным выбарам палітыкі аддаюць вельмі вялікую ўвагу.
Аляксей Дзікавіцкі, Варшава