Illa Vasilevič — vyklučany z kaledža i 13-y padazravany ŭ «biesparadkach»

19-hadovy Vasilevič adbyŭ 10 sutak źniavoleńnia, ciapier — kinuty ŭ SIZA KDB.

09.01.2011 / 17:45

Dzieviatnaccacihadovy Ilja Vasilevič staŭ 13-m padazronym pa kryminalnaj spravie ab masavych biesparadkach u Minsku 19 śniežnia, paviedamlaje pravaabarončy resurs spring96.org.

Vasilevič adbyŭ 10-sutačny administracyjny aryšt i byŭ adpuščany na volu. «Jamu paviedamili, što administracyja Minskaha politechničnaha kaledža adličvaje jaho z navučalnaj ustanovy, — infarmujuć pravaabaroncy. — 5 studzienia małady čałaviek byŭ zaprošany ŭ administracyju kaledža dla padpisańnia adpaviednych papier, ale ŭ navučalnaj ustanovie Ilju čakali supracoŭniki KDB, jakija zatrymali chłopca dla praviadzieńnia śledčych dziejańniaŭ pa kryminalnaj spravie ab masavych biesparadkach».

Spačatku Vasilevič byŭ dastaŭleny ŭ Centr izalacyi pravaparušalnikaŭ na vuł. Akreścina, a zatym pieraviedzieny ŭ SIZA KDB.

Pavodle źviestak pravaabaroncaŭ, u kryminalnaj spravie ab masavych biesparadkach (čč. 1, 2 art. 293 KK) 25 abvinavačanych (21 znachodzicca pad vartaj, čatyry — pad padpiskaj ab niavyjeździe) i 13 padazronych (šeść — pad vartaj, piać — pad padpiskaj ab niavyjeździe, dva — za miažoj). Za kratami znachodziacca čatyry abvinavačanyja ŭ złačynstvie kandydaty ŭ prezidenty na vybarach 2010 hoda (Uładzimir Niaklajeŭ, Alaksiej Michalevič, Andrej Sańnikaŭ i Mikałaj Statkievič), pad padpiskaj ab niavyjeździe — adzin (Vital Rymašeŭski). Jašče dva kandydaty, Ryhor Kastusioŭ i Dźmitryj Us, źjaŭlajucca padazronymi i znachodziacca pad padpiskaj ab niavyjeździe.