Сукала паабяцаў сустрэцца з кожнай жанчынай, не згоднай з рашэннем суда

08.02.2011 / 10:36

Старшыня Вярхоўнага суда Валянцін Сукала паабяцаў у сакавіку асабіста сустрэцца з кожным прадстаўніком групы жанчын, якія падпісалі чарговы зварот на яго імя, паведаміла юрыст Тамара Сяргей.

Паводле яе слоў, 7 лютага 19 прадстаўнікоў групы жанчын, якія пацярпелі ад асабліва цяжкіх злачынстваў, не згодныя з рашэннямі судоў па сваіх грамадзянскіх справах і крымінальных справах блізкіх, перадалі Сукалу калектыўны зварот — 17-ы з ліпеня 2009 года. Падачу звароту яны матывавалі тым, што на індывідуальныя скаргі ў парадку нагляду працягваюць атрымліваць фармальныя адпіскі, у якіх няма адказу на пастаўленыя пытанні.

«13 і 14 снежня 2010 года большасць падпісантаў былі ў Вас на асабістым прыёме. Вы абяцалі даць адказы на нашы скаргі ў адпаведнасці з заканадаўствам краіны. Аднак, на жаль, гэтага зноў не адбылося», — гаворыцца ў звароце.

Яго аўтары падкрэсліваюць, што Сукала парушае правы грамадзян, дадзеныя артыкулам 40 Канстытуцыі.

Тамара Сяргей выказала надзею, што ў наступным месяцы Сукала прыме ўсіх, хто падпісаў звароты, і кожнаму з іх асабіста дасць адказ у адпаведнасці з заканадаўствам.

7 снежня 2010 на IV Усебеларускім народным сходзе Аляксандр Лукашэнка даручыў кіраўніку сваёй адміністрацыі Уладзіміру Макею і генеральнаму пракурору Рыгору Васілевічу разабрацца з пытаннямі, якія паставілі перад уладамі прадстаўнікі групы жанчын на пікеце 6 снежня на плошчы Свабоды ў Мінску.

Юрыст нагадала, што 7 лютага 2007 года група жанчын упершыню заявіла пра сябе правядзеннем прэс-канферэнцыі, падчас якой звярнулася да грамадства па падтрымку ў абарону сваіх правоў, парушаных чыноўнікамі суда і пракуратуры. За чатыры гады група правяла дзясяткі акцый і дамаглася вынясення 22 пракурорскіх пратэстаў на судовыя пастановы. «Частка гэтых пратэстаў ужо задаволена. Усё гэта гаворыць пра тое, што можна дамагчыся справядлівасці ў органах суда і пракуратуры, калі грамадзяне, пераадольваючы страх, паслядоўна і мэтанакіравана адстойваюць свае правы», — падкрэсліла Тамара Сяргей.