Jarmošyna zrabiła kamplimient Darafiejevu

Svoj sychod z tok-šou «Vybar» jana ŭmudryłasia nazvać «absalutna žanočym, matčynym učynkam».

23.02.2011 / 12:48

Staršynia Centrvybarkama Lidzija Jarmošyna, mabyć, nikoli nie zabudzie efir prahramy «Vybar» 19 śniežnia 2010 hoda. Svoj sychod z tok-šou jana ŭmudryłasia nazvać «absalutna žanočym, matčynym učynkam».

Nahadajem, što ŭviečary 19 śniežnia na kanale ANT razhulałasia strašnaja drama. Viadoŭca «Vybaru» Siarhiej Darafiejeŭ dazvoliŭ sabie — o žach! — zadavać niazručnyja pytańni pradstaŭnikam ułady: naprykład, čamu pradstaŭnikam apazicyi nie dazvolili dziažuryć nočču na vybarčych učastkach razam ź milicyjaj.

Lidzija Jarmošyna, nie pryzvyčajenaja da takoj dyskusii, chucieńka zmatała vudy — ad hrachu padalej. A ciapier u intervju časopisu Sexus staršynia CVK tak prakamientavała historyju dvuchmiesiacovaj daŭnaści:

— Ja zrabiła jak žančyna, jak maci. Supracoŭniki CVK — tyja ž dzieci, ludzi, jakija tabie davierylisia. Chiba moža maci, viedajučy, što jaje dzieci ŭ biadzie, spakojna dzieści znachodzicca?
Tak što heta absalutna žanočy, maciarynski ŭčynak. Nie, viadoŭca nie raźjušyŭ mianie. Ale toje, što jon mianie dastaŭ za hetuju pieradaču, mahu skazać adnaznačna.

Nasamreč takaja zajava z vusnaŭ Lidzii Jarmošynaj — heta kamplimient. Zrešty, naŭrad ci Siarhiej Darafiejeŭ imknuŭsia jaje «dastać».

Prosta piaščotnaja ŭraźlivaja sutnaść staršyni Centrvybarkama nie vytrymlivaje navat najmienšych pytańniaŭ «nie ŭ maść».