Затрыманага ў Оршы галоўрэда расійскага інфармагенцтва «Свабода» даставілі ў суд
абноўлена
24.03.2011 / 10:43
Аляксандр Лашманкін накіроўваўся ў ноч на 24 сакавіка ў Мінск на цягніку Чалябінск — Брэст. Супрацоўнікі беларускага МУС знялі яго на станцыі Орша.Гэта першы прыпынак пасля мяжы.
Раніцай Аляксандр даслаў смс-паведамленне сваім калегам. Ён напісаў, што ўжо знаходзіцца ў судзе. Абвінавачваюць яго ў хуліганстве. Прадстаўнікі Беларускага Хельсікнскага камітэта спрабуюць трапіць на суд.
Як паведамілі калегі затрыманага, ноччу ён знаходзіўся ў памяшканні лінейнага аддзела ўнутраных справаў станцыі. Ніякіх абвінавачанняў не выстаўлялася. Патлумачыць прычыны затрымання беларускія міліцыянты адмаўляліся. Мабільны тэлефон у расійскага журналіста не выключаны, ён можа адказваць на званкі.
Дзяжурны консул пасольства Расіі ў Мінску ўжо ведае пра інцыдэнт і спрабуе высветліць акалічнасці справы.
Як стала вядома, Аляксандр Лашманкін мае афіцыйную акрэдытацыю ў МЗС Беларусі ў якасці замежнага журналіста.