Iryna Hubskaja (BCHD) abviaściła suchuju haładoŭku?
27.03.2011 / 16:47
Kaardynatar arhkamiteta pa stvareńni partyi «Biełaruskaja chryścijanskaja demakratyja» Iryna Hubskaja, jakaja była zatrymana 25 sakavika i znachodzicca ŭ Centry izalacyi pravaparušalnikaŭ (CIP) HUUS Minharvykankama, chutčej za ŭsio, abjaviła suchuju haładoŭku.
Da takoha mierkavańnia pryjšli jaje siabry paśla taho, jak u CIP im viarnuli pieradaču, adrasavanuju Hubskaj.
Jak skazaŭ BiełaPAN adkazny sakratar arhkamiteta BCHD Dzianis Sadoŭski, 26 sakavika Irynie była pieradadziena pieradača, u jakoj, akramia inšaha, znachodzilisia butelki z vadoj. «Praz try hadziny nam patelefavanali z centra izalacyi i skazali, što Hubskaja admoviłasia prymać pieradaču. Heta, chutčej za ŭsio, aznačaje, što jana abjaviła haładoŭku, a kali navat vadu nie pieradali — značyć, suchuju. Heta značyć, Iryna nie jeść i nie pje», — ličyć Sadoŭski.
Iryna Hubskaja była zatrymana ŭ Dzień Voli na praśpiekcie Niezaležnaści kala redakcyi haziety «Viečiernij Minsk» u 17.45, za 15 chvilin da abjaŭlenaj akcyi na płoščy Jakuba Kołasa.
Razam ź joj zatrymali členaŭ arhkamiteta BCHD Taćcianu Kim i Hannu Šapućku. Ich advieźli va UUS Centralnaha rajona Minska nibyta dla vyśviatleńnia asob. Tam na Irynu byŭ składzieny pratakoł, ab čym jana paśpieła paviedamić Sadoŭskamu. Adnak u čym kankretna jaje abvinavačvajuć, Hubskaja nie skazała. Zatym aktyvistku dastavili ŭ CIP. Čakajecca, što sud nad joj adbudziecca 28 sakavika.
Nahadajem, pavodle źviestak pravaabaroncaŭ, 25 sakavika padčas akcyj z nahody Dnia Voli ŭ Minsku było zatrymana bolš za paŭsotniu čałaviek. Bolšaść ź ich adpuścili z adździaleńniaŭ milicyi biez składańnia pratakołaŭ. Dakładnaja kolkaść tych, chto zastajecca pad vartaj, nieviadomaja. Miarkujecca, što zaŭtra nad imi projduć sudy.