Уклады за мяжой – альтэрнатыва для недаверлівых

Стаўкі па дэпазітах ва Украіне роўныя беларускім. А ў надзейных банках ЕС — ніжэйшыя. «Наша Ніва» аналізуе сітуацыю з банкаўскімі ўкладамі ў пяці суседніх з Беларуссю дзяржавах.

11.04.2011 / 00:42

Стаўкі па дэпазітах ва Украіне роўныя беларускім. А ў надзейных банках ЕС — ніжэйшыя.

Валютныя ўклады ў Беларусі і ў суседзяў. Шукаліся варыянты размяшчэння 2000 еўра ці іншай валюты ў эквіваленце тэрмінам на 1 год.

Давер да айчыннай банкаўскай сістэме сярод беларусаў менее. Колькі б ні даводзіў старшыня Нацбанку Пятро Пракаповіч, што сітуацыя пад кантролем і ўкладам нічога не пагражае, насельніцтва працягвае мэтанакіравана выносіць свае грошы з банкаў.

Лежачы пад падушкай, яны не прыносяць працэнтаў, але даюць адчуванне бяспекі.

Калі ж не давяраць «Беларусбанку», «Белінвестбанку» і кампаніі, то куды несці грошы, адкладзеныя на будучыню ці хаця б на чорны дзень? Адна з альтэрнатыў — замежныя банкі. Усяго 200–300 кіламетраў ад Мінска і яшчэ бліжэй ад абласных гарадоў, і беларускія ўлады не змогуць замарозіць валютны ўклад ці абвесціць дэвальвацыю грошай на рублёвым дэпазіце. «Наша Ніва» аналізуе сітуацыю з банкаўскімі ўкладамі ў пяці суседніх з Беларуссю дзяржавах.

Падазрона высокія стаўкі

Але спачатку пра нашу краіну. З аднаго боку, банкі павялічваюць працэнтныя стаўкі па валютных укладах, робячы прапанову ўсё больш прывабнай. З іншага, такія лічбы не выклікаюць даверу, бо выглядаюць раздзьмутымі як бурбалка, якая можа лопнуць у любы момант.

Напрыклад, РРБ-Банк гатовы ўзяць даляры альбо еўра на 18 месяцаў, выплаціўшы 9,5% гадавых. Прычым стаўка — фіксаваная. Гэта рэдкі выпадак для беларускіх банкаў, якія імкнуцца заключаць дамовы з рухомай стаўкай. Гэта значыцца, што ўмовы могуць быць перагледжаныя банкам у аднабаковым фармаце ў любы час.

Большасць беларускіх банкаў гатовыя пакуль што выплачваць за ўклады ў валюце 8% гадавых. Што да ўкладаў у рублях, то тут стаўкі даходзяць да 20%.

Стаўкі меншыя, давер большы

Калі параўноўваць сітуацыю з той, што ёсць у суседзяў, то бачная галоўная хіба дэпазітаў у краінах Еўрасаюза — надзвычай нізкія працэнтныя стаўкі. Калі ўдасца знайсці варыянт з хаця б 3,5% гадавых, гэта рэдкі поспех.

У Літве, як і ў Польшчы, валютныя прапановы для нерэзідэнтаў краіны ўвогуле складаюць каля 1–2%, у Латвіі ўдвая вышэй — 3–3,5%.

У Расіі і Украіне стаўкі па дэпазітах падобныя да беларускіх. Вось толькі высокі прыбытак абяцаюць маленькія банкі, якія адчыняюцца-зачыняюцца часцей. Калі ж звярнуцца ў салідныя ўстановы, то стаўкі па валютных дэпазітах складуць 6–8%, прычым ва Украіне даляр лічыцца больш прыбытковым.

Парушэнне без адказнасці — не парушэнне?

Галоўнае пытанне — наколькі легальна мець замежны рахунак? Калі кіравацца законам літаральна, то кожны грамадзянін, які адкрывае рахунак па-за межамі Беларусі, павінен атрымаць дазвол ад Нацбанку. Для гэтага трэба напісаць у банк заяву адвольнай формы, у якой указаць сваё імя, адрас, пашпартныя дадзеныя, рэквізіты замежнага банку і — галоўнае — аргументацыю, чаму вам неабходны замежны рахунак? Калі ўдасца даказаць сваю пазіцыю, то будзе выдадзены дазвол тэрмінам на адзін год, які трэба будзе працягваць штогод. Але

недасканаласць беларускага заканадаўства праяўляецца ў тым, што ніякай адказнасці за такія парушэнні не прадугледжана — ні крымінальнай, ні адміністратыўнай. Пакараць могуць толькі службовых асобаў, але не звычайных грамадзян.

Яўген Васількоў