У Страсбургу адкрываецца веснавая сесія ПАСЕ, якая разгледзіць сітуацыю ў Беларусі

11.04.2011 / 11:34

Як паведамілі ў прэс-службе ПАСЕ, «беларускае пытанне» будзе абмяркоўвацца 12 красавіка на пасяджэнні Палітычнага камітэта ПАСЕ. Для ўдзелу ў дыскусіі запрошаны прадстаўнікі беларускай апазіцыі і эксперты АБСЕ. Удзел у пасяджэнні таксама возьме дакладчык ПАСЕ па сітуацыі ў Беларусі Сініка Хурскайнен.

Адным з асноўных момантаў сесіі будуць «дэбаты па рэлігійным вымярэнні міжкультурнага дыялогу», падчас якіх перад парламентарыямі выступяць патрыярх Румыніі Данііл, старшыня Папскага савета па міжрэлігійным дыялогу Ватыкана кардынал Жан-Луі Торан, старшыня кіраўніцтва па справах рэлігіі Турцыі Мехмет Гёрмез, галоўны рабін Расіі Берл Лазар і паўнамоцны прадстаўнік Савета евангелічнай царквы ў Германіі і ЕС прэлат Бернгард Фелмберг.

13 красавіка ў ПАСЕ выступіць прэм’ер-міністр Турцыі Рэджэх Таіп Эрдаган.

Апрача таго, на парадку дня сесіі — дыскусіі аб выкананні Грузіяй сваіх абавязкаў і абавязацельстваў як члена Савета Еўропы, аб зніжэнні да 16 гадоў выбарчага ўзросту, аб становішчы жанчын у сельскай мясцовасці ў Еўропе, аб празмернай запазычанасці дзяржаў і аб выхаванні як сродку барацьбы з насіллем у школе.

У дэбатах аб смяротнай кары ў краінах-членах і краінах-назіральніках пры Савеце Еўропы выступіць старшыня Міжнароднай камісіі супраць смяротнай кары Федэрыка Маёр Сарагоса, камісар Савета Еўропы па правах чалавека Томас Хамарберг прадставіць даклад аб сваёй дзейнасці ў 2010 годзе.

Сесія ПАСЕ завершыцца 15 красавіка.