Лябедзька: Раманчук не створаны для такіх кампаній, якія праводзяцца ў Беларусі

«І гэта недзе і мая віна».

11.04.2011 / 13:49

Лідар Аб’яднанай грамадзянскай партыі (АГП) Анатоль Лябедзька, які выйшаў са следчага ізалятара КДБ 6 красавіка, дагэтуль не ведае «ўсіх нюансаў» сітуацыі з Яраславам Раманчуком. Пра гэта ён заявіў у інтэрв’ю БелаПАН.

Нагадаем, 20 снежня, на наступны дзень пасля прэзідэнцкіх выбараў, жорсткага разгону мітынгу на плошчы Незалежнасці і арышту апазіцыйных дзеячаў, экс-кандыдат у прэзідэнты ад АГП Яраслаў Раманчук склікаў прэс-канферэнцыю, на якой пракаментаваў тое, што адбылося. Ён, у прыватнасці, заявіў, што дэманстрацыя планавалася на Кастрычніцкай плошчы як выключна мірнае выказванне меркавання грамадзян. «На жаль, падчас мітынгу Мікалай Статкевіч, Андрэй Саннікаў і Віталь Рымашэўскі заклікалі і павялі людзей на плошчу Незалежнасці. Там імі ж былі справакаваныя беспарадкі і зроблена спроба захопу будынка Дома ўрада. Пад пагрозай апынуліся жыцці тысячы чалавек», — заявіў Раманчук. Раманчук публічна асудзіў заклікі да дзеянняў, што парушалі мірны характар правядзення масавых акцый. «Падзеі ночы 19 снежня паставілі пад пагрозу жыцці людзей. Андрэю Саннікаву, якога падагравала яго жонка Ірына Халіп, вельмі хацелася сарваць кволы дыялог, які нараджаўся паміж Беларуссю і міжнароднай супольнасцю», — канстатаваў палітык.

Паводле слоў Лябедзькі, пасля выхаду з СІЗА ён бачыўся з Раманчуком, але да канца ў сітуацыі яшчэ не разабраўся. «Яраслаў сказаў, што калі б ён гэта не зрабіў, то была б фізічная расправа нада мной і іншымі людзьмі. Не ведаю, як бы я ў гэтай сітуацыі дзейнічаў», — сказаў лідар АГП.

«Пасля вызвалення ў мяне склалася ўражанне, што

многія лічаць самай вялікай праблемай у краіне справу Раманчука, але гэта не так,
 — падкрэсліў Лябедзька. — Так, Яраслаў Раманчук — адзін з людзей, да паводзін якіх ёсць пытанні. Іншая рэч, што з-за нейкіх акалічнасцяў ён узяў усё на сябе, як губка. Але ж у гэты транш упісваюцца вельмі многія: дагэтуль усе былі вельмі прыгожыя, моцныя, пераканаўчыя (…), а вось калі ўзнікла сітуацыя…».

«Яраслаў Раманчук не створаны для такіх кампаній, якія праводзяцца ў Беларусі, я гэта зараз разумею. І гэта недзе і мая віна, што я да канца не дадумаў, што можа быць вось такі сцэнар», — дадаў Лябедзька.

Ён падкрэсліў, што перад ім зараз стаіць «задача перафарматавання каманды». «Я павінен разумець, хто ёсць хто ў гэтай камандзе», — сказаў лідар партыі.