Хай адкажуць: Гамяльчанка, затрыманая на акцыі маўклівага пратэсту, падала скаргу на незаконныя дзеянні міліцыі

07.07.2011 / 10:56

Гамяльчанка Галіна Стараселец 6 ліпеня звярнулася да пракурора Цэнтральнага раёна Гомеля са скаргай на незаконныя дзеянні супрацоўнікаў органаў унутраных спраў. Жанчына была затрымана 3 ліпеня ў цэнтры горада падчас акцыі маўклівага пратэсту.

Як паведаміла Стараселец, яна просіць правесці праверку па фактах учынення супрацоўнікамі Цэнтральнага РАУС Гомеля супрацьпраўных дзеянняў і прыняць меры пракурорскага рэагавання.

«Калі я на вуліцы размаўляла з сынам па мабільным тэлефоне, мужчына ў міліцэйскай форме і з гучнагаварыцелем у руках нечакана ўказаў пальцам на майго калегу, які стаяў побач, загадаўшы затрымаць яго. А затым, указваючы на мяне, крыкнуў сваім падначаленым: „І гэтую забірайце!“, — паведаміла Стараселец. — Падышлі два чалавекі ў плямістай форме, не назваўшыся і не растлумачыўшы прычын майго затрымання, прапанавалі сесці ў аўтамабіль „Опель Астра“, нумар 0601ВВ-0. Я не пасмела аслухацца прадстаўнікоў улады і пакорліва пайшла за імі ў машыну. Нас даставілі ў Цэнтральны РАУС, дзе праверылі пашпарты і падверглі працяглым допытам і надглядам».

У скарзе пракурору жанчына піша, што яна спакойны і ўраўнаважаны чалавек, ніколі не выкарыстоўвае ў сваёй гаворцы ненарматыўную лексіку.

«Як жа мяне ўразіла, калі ў 23 гадзіны я даведалася, што затрымана за гучнае выкрыкванне брыдкіх слоў і парушэнне грамадскага парадку. Мяне пасадзілі за краты, не дазволіўшы пазваніць сваякам. У дзяжурнай частцы міліцыянеры паводзілі сябе па-хамску, нейкі міліцэйскі чын, які забіраў мае рэчы, крычаў на мяне, хаця я прычын не давала.

Я пачула ад супрацоўнікаў міліцыі столькі нецэнзурнай лаянкі, колькі не давялося чуць за ўсё маё жыццё», — напісана ў скарзе.

Жанчына падкрэслівае, што ёй страшна жыць у краіне, дзе да добрапрыстойных грамадзян вось так груба ставіцца міліцыя. Яна не разумее, якія яе дзеянні маглі выклікаць неапраўдана жорсткае абыходжанне.

4 ліпеня суддзя суда Цэнтральнага раёна Гомеля Алена Цалкова прызнала Стараселец вінаватай у нецэнзурнай лаянцы і аштрафавала на 105 тыс. рублёў. Супраць жанчыны сведчылі міліцыянеры. Гамяльчанка мае намер абскардзіць рашэнне суда ў вышэйшай інстанцыі.