Дзмітрый Ус праходзіць у Мінску абследаванне для пацвярджэння інваліднасці

07.07.2011 / 10:58

Экс-кандыдат у прэзідэнты Дзмітрый Ус быў пераведзены з магілёўскай калоніі ў СІЗА № 1 у Мінску для правядзення абследавання на прадмет пацвярджэння інваліднасці. Пра гэта БелаПАН паведаміла яго жонка Яўгенія.

6 ліпеня ёй не ўдалося дабіцца сустрэчы з мужам. Затое з асуджаным экс-кандыдатам у прэзідэнты сустрэўся яго адвакат Аляксандр Галіеў. Настрой у Дзмітрыя Уса нармальны, схуднеў ён не на 20–30 кг, як паведамлялася раней, а на 8 кг. Яўгенія паведаміла, што, як высветлілася, 5 ліпеня Дзмітрыя Уса прывозілі ў 6-ю паліклініку. Яна была ў гэты час там жа.

Муж і жонка не ўбачыліся толькі таму, што знаходзіліся ў розных калідорах.

11 ліпеня Дзмітрыя Уса павінны адправіць назад у калонію.

26 мая за арганізацыю масавых беспарадкаў у дзень прэзідэнцкіх выбараў суд Ленінскага раёна Мінска прыгаварыў Уса да пяці з паловай гадоў пазбаўлення волі ў калоніі ўзмоцненага рэжыму. Разгляд касацыйнай скаргі ў Мінскім гарадскім судзе прызначаны на 19 ліпеня.

Як ужо паведамлялася, некалькі гадоў таму Дзмітрый Ус перанёс цяжкую аперацыю, ляжаў шмат дзён у коме, пасля гэтага яму была прызначана 2-я група інваліднасці, якую ён не стаў пацвярджаць напярэдадні выбараў.