Сёння павінны судзіць затрыманых за ўдзел у акцыі пратэсту 6 ліпеня

Па дадзеных праваабаронцаў, па ўсёй Беларусі ўчора было затрымана прыкладна 400 чалавек, у тым ліку каля 190 - у Мінску.

07.07.2011 / 11:34

Па дадзеных праваабаронцаў, па ўсёй Беларусі ўчора было затрымана прыкладна 400 чалавек, у тым ліку каля 190 — у Мінску.

На дадзены момант вядома, што

ў Мінску працэсы над затрыманымі пройдуць сёння ў судах Кастрычніцкага (12 спраў), Маскоўскага (15 спраў) і Заводскага (8 спраў) раёнаў. Па астатніх судах інфармацыі ў праваабаронцаў пакуль няма.

Па-ранейшаму застаецца невядомым лёс шэрагу затрыманых удзельнікаў акцыі маўклівага пратэсту 3 ліпеня. Нагадаем, тады, па неафіцыйных дадзеных, у Беларусі было затрымана прыкладна 390 чалавек: каля 210 чалавек — у Мінску і прыкладна 180 — у рэгіёнах. Суды над некаторымі адбыліся 4 ліпеня. У Мінску яны праходзілі ў судах Савецкага, Маскоўскага, Партызанскага, Кастрычніцкага, Фрунзенскага, Заводскага і Ленінскага раёнаў. У гэты дзень тут было асуджана 46 чалавек. Усе яны прызнаныя вінаватымі па артыкуле 17.1 Адміністрацыйнага кодэксу (дробнае хуліганства). Большасць асуджаных прысуджаныя да арыштаў на тэрмін ад 5 да 15 сутак. Шэсць чалавек пакараныя штрафамі ў памеры 20–30 базавых велічыняў.

Што адбылося з астатнімі затрыманымі 3 ліпеня, праваабаронцам невядома. Чакалася, што суды над імі будуць працягнутыя 5 ліпеня, аднак у канцылярыях судоў інфармацыю па гэтай нагоды праваабаронцам прадастаўляць адмаўляюцца.

Усяго за час правядзення акцый, арганізаваных групай «Рэвалюцыя праз сацыяльныя сеткі», якія праходзяць у Беларусі з 8 чэрвеня,

было затрымана каля 1 тыс. 730 чалавек, у тым ліку 980 — у Мінску.

БелаПАН