На Глыбоччыне скралі звон з касцёльнай званіцы

05.09.2011 / 10:12

У вёсцы Дзеркаўшчына Глыбоцкага раёна невядомыя злодзеі скралі звон з касцельнай званіцы.

Як распавёў пробашч касцёла Віталь Галец, міліцыянтам удалося знайсці на месцы злачынства згублены інструмент і сляды крыві.

Пасля закрыцця касцёла камуністамі ў 1960-х гадах звон захоўвала ў сваім доме адна з парафіянак, і вярнула яго касцёлу ў 1990 годзе. Фотаздымкаў звону, адлітага ў ХІХ стагоддзі, не захавалася.

Касцёл у Дзеркаўшчыне быў збудаваны ў 1822 г. на сродкі Лявона Дамейкі, роднага дзядзькі навукоўца Ігната Дамейкі.