У Францыі пачынаецца суд над экс-прэзідэнтам Жакам Шыракам

Яму пагражае да 10 гадоў турмы.

05.09.2011 / 10:19

У панядзелак пачынаецца суд над былым прэзідэнтам Францыі Жакам Шыракам, які абвінавачваецца ў незаконным фінансаванні сваёй партыі, калі быў мэрам Парыжа.

Аднак судовыя слуханні, магчыма, прыйдзецца адкласці: лекары выявілі, што 78-гадовы Шырак пакутуе на страту памяці.

Сам экс-прэзідэнт, які адкідае абвінавачванні, звярнуўся ў парыжскі суд з просьбай дазволіць адвакатам прадстаўляць яго інтарэсы на слуханнях.

Упершыню пасля Другой сусветнай вайны французскі лідар паўстане перад судом.

Жак Шырак, які займаў пасаду мэра Парыжа з 1977 па 1995 гады, абвінавачваецца па двух эпізодах, якія датычацца выплат членам яго партыі «Аб’яднанне ў падтрымку рэспублікі» за працу на пасадах, якіх не існавала.

Калі суд прызнае яго вінаватым, то экс-прэзідэнту пагражае да 10 гадоў турмы і штраф у 150 тысяч еўра.