«Мне гэта трэба? Не. Дзяржаве гэта трэба? Не»

Лукашэнка ўзняў пытанне аб мэтазгоднасці працы беларускіх дзьюці-фры магазінаў.

06.09.2011 / 12:02

Як паведамляе дзяржаўнае агенцтва БелТА, Лукашэнка ўзняў пытанне аб мэтазгоднасці працы беларускіх дзьюці-фры магазінаў. Лукашэнка запатрабаваў праінфармаваць аб мэтазгоднасці аднаўлення працы ў Беларусі. Ён адзначыў, што трэба «прынцыпова вызначыцца па пытанні працы магазінаў бяспошліннага гандлю».

Лукашэнка нагадаў, што пасля праверак Камітэта дзяржаўнага кантролю (КДК) у 2005 годзе было прынята рашэнне закрыць большасць гэтых магазінаў. КДК праверыў пяць арганізацый і больш за дваццаць дзьюці-фры, арганізаваў двухдзённы кругласутачны маніторынг продажу алкагольнай прадукцыі гэтымі магазінамі. У выніку інспекцыі стала вядома, што прыкладна 60% алкаголю нелегальна паступала на ўнутраны рынак Беларусі. У той жа час беларускі алкаголь займаў усяго 0,2% ад тавараабароту магазінаў бяспошліннага гандлю.

У нелегальных здзелках па рэалізацыі бяспошліннай алкагольнай прадукцыі на тэрыторыі Беларусі, паводле слоў Лукашэнкі, бралі ўдзел службовыя асобы, «якія маюць доступ у зоны пунктаў мытнага афармлення». Такім чынам, сказаў ён, па ўсёй краіне, у тым ліку і на мяжы, з’явіліся крымінальныя карупцыйныя пункты.

«Ініцыятары такога радыкальнага падыходу матывавалі неабходнасць закрыцця тым, што гэтыя гандлёвыя пункты з-за сістэматычных і масавых парушэнняў негатыўна ўплывалі не толькі на ўнутраны рынак тавараў, але і на карупцыю сярод мытнікаў, пагранічнікаў, мясцовага чыноўніцтва і іншых», — цытуе агенцтва кіраўніка беларускай дзяржавы.

Некалькі дзьюці-фры усё ж прадоўжылі працу, у прыватнасці, для абслугоўвання дыпламатычнага корпусу ў Мінску і для авіяпасажыраў у Нацыянальным аэрапорце Мінск.

Лукашэнка адзначыў, што апошнім часам дзяржаўныя структуры, якія раней выступалі супраць дзейнасці дзьюці-фры, цяпер сталі «актыўнымі прыхільнікамі іх адкрыцця». У ліку асноўных аргументаў, як тлумачаць гэтыя структуры, тое, што бяспошлінны гандаль — «гэта добрая крыніца паступлення валюты ў краіну» і «дадатковая магчымасць рэалізацыі айчынных тавараў».

«Акрамя таго, нашы суседзі на Захадзе актывізавалі гандаль бяспошліннымі таварамі праз сеткі магазінаў, размешчаных у аўтадарожных і чыгуначных пунктах пропуску праз дзяржаўную мяжу. Адгэтуль выснова: нам бы не адстаць», — сказаў ён.

Кіраўнік дзяржавы неаднаразова даручаў Савету міністраў, Кіраўніцтву справамі прэзідэнта, Нацбанку і КДК «унесці ўзгодненае рашэнне па пытаннях арганізацыі працы магазінаў бяспошліннага гандлю». Лукашэнка падкрэсліў, што гэта «пытанне важнае» і «ад яго не сысці».

На адрас беларускага лідара для падпісання накіраваны праект дакумента, які рэгламентуе працу ў сферы бяспошліннага гандлю. «Зыходзячы з гэтага дакумента, мэтазгоднасць аднаўлення працы такіх магазінаў сумненняў ні ў каго не выклікала, але ўмовы працы прыватнага бізнесу на гэтым сегменце рынку выявілі палярнасць поглядаў некаторых дзяржаўных органаў. Ёсць і іншыя праблемы», — сказаў Лукашэнка.

Паводле яго слоў, у часы шырокай дзейнасці беларускіх дзьюці-фры замежная валюта паступала ў краіну «не ў тых аб’ёмах, а спіртное і іншыя тавары ішлі не толькі за мяжу, але больш за ўсё ў зваротным напрамку і ў велізарных аб’ёмах».

Акрамя гэтага, прадоўжыў Лукашэнка, у гэтых магазінах гандлявалі галоўным чынам імпартнымі таварамі на льготных умовах, хоць планавалася прадаваць айчынную прадукцыю. Ён выказаў меркаванне, што на сёння сітуацыя мала змянілася.

«Айчынныя тавары ў тых магазінах, што былі пакінутыя, складаюць каля 5%. І што, вы мне прапаноўваеце гуляць у гэту гульню за 5% тавару і хочаце мяне пераканаць у тым, што не будзе той практыкі, што існавала раней? — запытаў ён удзельнікаў нарады. — Мне гэта трэба? Не. Дзяржаве гэта трэба? Не. Народу гэта беларускаму трэба, ён штосьці ад гэтага атрымліваў? Не».

Лукашэнка заявіў, што хацеў бы пачуць, каму будзе выгадна аднаўленне дзейнасці дзьюці-фры, «што атрымае дзяржава» і «якія аб’ёмы валюты пацякуць у краіну».