«Za ekanamičny kryzis pavinien adkazvać nie ŭrad, a asabista Łukašenka»
08.09.2011 / 01:09
Za nastupstvy ekanamičnaha kryzisu ŭ Biełarusi pavinien adkazvać nie ŭrad, a asabista Alaksandr Łukašenka. Pra heta zajaviŭ namieśnik staršyni Abjadnanaj hramadzianskaj partyi Leŭ Marholin 7 vieraśnia napres-kanfierencyi ŭ Minsku.
«Siońnia varta stavić pytańnie ab adstaŭcy ŭrada. Ale jon u Biełarusi ničoha nie vyrašaje. Pakolki ŭsiu adkaznaść na siabie biare Łukašenka, to na paradku dnia staić pytańnie pra jaho adstaŭku», — ličyć namieśnik staršyni AHP.
Marholin zajaviŭ, što paśla paharšeńnia ekanamičnaj situacyi «ŭrad šeść miesiacaŭ znachodziŭsia ŭ stupary, ničoha nie robiačy». Pavodle jaho mierkavańnia, zachady, što stała rabić ułada pa vychadzie z kryzisu ŭ apošni čas, «nie tolki zapoźnienyja, ale i pałavinčatyja», pakolki jana nie viedaje realnaha stanovišča ŭ krainie i nie razumieje hłybinnych pryčyn kryzisu.
Palityk zajaviŭ, što ŭ AHP jość «asensavanaja» prahrama vychadu z kryzisu. «My hatovy ŭziać na siabie adkaznaść za praviadzieńnie ekanamičnych reform. Adnak da našych prapanoŭ ułada nie prysłuchoŭvajecca», — skazaŭ jon.
Marholin taksama zajaviŭ, što AHP i ŭ nadalej budzie prapanoŭvać šlachi vychadu z kryzisu. Adnak, padkreśliŭ jon, «bieź źmieny ŭłady ničoha nie vyrašycca».