Hienprakuratura kanstatuje šmatlikija parušeńni zakanadaŭstva ab achovie historyka-kulturnaj spadčyny ŭ Minsku

08.09.2011 / 13:53

Jak paviedamiŭ 8 vieraśnia žurnalistam načalnik upraŭleńnia pa nahladzie za vykanańniem zakanadaŭstva i zakonnaści pravavych aktaŭ Hienprakuratury Pavieł Radzivonaŭ, takaja vysnova zroblena na padstavie vybaračnaj pravierki, praviedzienaj u kvartale vulic Internacyjanalnaja, Kamsamolskaja i Revalucyjnaja niepadalok ad budynka prakuratury.

Ustanoŭlena, što absalutnaja bolšaść rekłamy na fasadach budynkaŭ, jakija ŭjaŭlajuć historyka-kulturnuju kaštoŭnaść, znachodzicca tam niezakonna. Składziena 19 pratakołaŭ ab administracyjnych pravaparušeńniach u dačynieńni da raspaŭsiudžvalnikaŭ rekłamy. Šeść ź ich zaraz razhladajuć u sudach.

Pavodle vynikaŭ pravierki Hienprakuratura nakiravała dakładnuju zapisku ab uzmacnieńni kantrolu za raźmiaščeńniem rekłamy ŭ Ministerstva kultury i Minski harvykankam.

Jak zaznačyŭ Radzivonaŭ, padčas pravierki była vyjaŭlena jašče adna prablema. Navat u tych niešmatlikich vypadkach, kali ŭzhadnieńnie na raźmiaščeńnie rekłamy isnavała, samo jaje raźmiaščeńnie nie adpaviadała patrabavańniam zakanadaŭstva. U jakaści prykładu Radzivonaŭ pryvioŭ dva budynki na vulicy Kamsamolskaja. Abodva jany ŭjaŭlajuć historyka-kulturnuju kaštoŭnaść. U pieršym vypadku rekłamaj zaniata praktyčna 40% fasada, u druhim — na fasadzie znachodziacca siem vidaŭ roznakalarovaj rekłamy. «Estetyčnaje ŭsprymańnie historyka-kulturnaj kaštoŭnaści ad hetaha cierpić», — kanstatavaŭ pradstaŭnik Hienprakuratury.

Jon paviedamiŭ, što ŭ Minkultury nakiravany list z patrabavańniem pierahledzieć vydadzienyja ŭzhadnieńni i razhledzieć pytańnie ab demantažy rekłamy. Pastaŭlena taksama pytańnie ab pryciahnieńni da dyscyplinarnaj adkaznaści šerahu rabotnikaŭ ministerstva za parušeńnie zakanadaŭstva ab achovie kulturnaj spadčyny.

Radzivonaŭ paviedamiŭ, što ŭ Biełarusi bolš jak 5 tys. abjektaŭ historyka-kulturnaj spadčyny, u tym liku ŭ Minsku — pryblizna 300. Vyrašać prablemu ich achovy Hienprakuratura maje namier ź Ministerstvam kultury, ź jakim u lipieni było zaklučana adpaviednaje pahadnieńnie.