«Ляпісы» і «Тройца» у топе найлепшых альбомаў паўгоддзя

Experty.by апублікавалі рэйтынг.

16.09.2011 / 13:07

Сайт experty.by апублікаваў рэйтынг альбомаў, выпушчаных у першым паўгоддзі 2011 года. На першым месцы апынуўся альбом этна-трыа «Тройца» «Зімачка», другое месца занялі «Ляпіс Трубяцкой» з альбомам «Весёлые картинки».

Увесь ТОП-10 выглядае так:

1. Тройца «Зімачка» — 9,50

2. Ляпіс Трубяцкой «Веселые картинки» — 9,00

3. Akute «Дзевачкі і космас» — 8,25

4. Сярэбранае Вяселле «Сердечная мускулатура» — 8,25

5. Пятля Прыстрасція «Гипнопедия» — 7,50

6. Зміцер Вайцюшкевіч «Чара» — 7,50

7. Sounduk «Том первый» — 7,25

8. B_Side «Smooth Season» — 7,25

9. Rockerjoker «Продается планета» — 7,25

10. Калачыкам Рядом «Холода» — 7,25

Беларуская музыка, наколькі б разнастайнай яна не здавалася (намінальна ў нас прысутнічае большасць папулярных музычных стыляў), усё ж такі прабуксоўвае. У лідарах застаюцца этна і рок. Прычым, калі этна ў нас вельмі шмат і рознага, з рок-музыкай трошкі складаней.

Чаму перамаглі «Ляпісы».
Мы — людзі тэкстацэнтрычныя. Традыцыя слухаць у першую чаргу тэксты, а толькі пасля музыку засталася нам ад савецкіх часоў. Песні для нас — гэта, хутчэй, вершы пад музыку, чым мелодыя са словамі. У чым сакрэт чатырох апошніх альбомаў «Ляпісаў»? Як толькі яны адышлі ад псеўдашансон-тэматыкі, за якую іх любілі вахцёры, прадаўцы і іншыя людзі, якія ўвесь час мусяць слухаць на працы радыё, тэксты Міхалка сталі цікавыя і новай аўдыторыі. Пры гэтым старая нікуды не падзелася. Пад «Капітал» танчылі і на сельскіх дыскатэках, і ў клубах узроўню «Рэактара». Майстэрства «Ляпісаў» як музыкаў таксама моцна вырасла — гэта вельмі шчыльная па гучанні рошчына року, ска, панку і ўсяго, чаго душа захоча. Такім чынам,
спалучэнне «вельмі патрэбных і сваечасовых» тэкстаў, моцнага стадыённага запалу і музычнага майстэрства, зрабілі з «Ляпісаў» галоўны гурт Беларусі: цяпер яны могуць запісваць што заўгодна — усё адно яно будзе аўтаматычна праходзіць па катэгорыі «нашае ўсё».

У «Тройцы» канкурэнцыя мацнейшая, чым у «Ляпісаў» — этна-калектываў (ад раскошных да непралазна дрэнных) у Беларусі сотні. Аднак праца з матэрыялам у выпадку Кірчука і кампаніі настолькі тонкая і прадуманая да кожнай ноты, што іх можна без праблем запрашаць на любы фестываль — хоць разам з Tinariwen, хоць з U2. Калі шараговыя слухачы, што мала цікавяца этнікай, могуць і не ўспрыняць «Тройцу», дык сярод прафесійных музыкантаў, якія да Беларусі і дачынення не маюць, Кірчук карыстаецца такім попытам і павагай, што любы іншы беларускі музыка можа пра такое толькі марыць.

Кожны наступны альбом «Тройцы» лепшы за папярэдні, таму і падумаць страшна, чым гэта можа скончыцца.

Таму зрушыць такіх мастадонтаў, як «Ляпісы» і «Тройца» з першых месцаў хіт-параду проста нерэальна. Пры гэтым, каб за першыя шэсць месяцаў новы альбом выпусцілі «Нейра Дзюбель», яны б увайшлі ў Топ-10. Каб выпусціла «Крама» — увайшла б і яна.

У сёлетнем спісе здзіўляцца асабліва няма чаму — хто сумняваўся, што там будуць «Серебряная свадьба», Вайцюшкевіч, Sounduk (бо яго ўспрымаюць усё адно як «Дзецідзяцей»), Rockerjoker i Akute?

Шаноўных экспертаў абвінаваціць няма ў чым — тут няма густаўшчыны, ці прасоўвання «сваіх» — музыканты з першых месцаў самі каго заўгодна могуць прасунуць на сцэну і нават у топ. Аднак мы можам сказаць, што музычная сітуацыя замкнулася ў сабе. І вышэйпералічаныя мэтры, мала таго, што ўжо жывыя класікі, дык яшчэ і лідары музычнага жыцця, а гэта кажа не на карысць музычнага працэсу.

Юрась Ускоў