Achova Łukašenki baicca doŭhich abjektyvaŭ

Fotažurnalisty i apieratary nie zmohuć trapić u «serca» «Dažynak» biez admysłovaj akredytacyi.

29.09.2011 / 17:02

Zhodna z praviłami Minabłvykankama, u «režymnuju zonu» zabaroniena prachodzić z fota- i videaaparaturaj z abjektyvam zvyš 4 sm. Praviły, zhodna ź jakimi hramadzianam stroha zabaraniajecca biez «admysłovaha dazvołu» pranosić fotaapparaty i videakamiery ź vialikimi abjektyvami ŭ aharodžanuju na čas praviadzieńnia fiestyvalu zonu Maładziečna, źjavilisia ŭ «Žyvym časopisie» Minskaha HUUS 28 vieraśnia.

«Navina» vyklikała zaniepakojenaść u niekatorych fatohrafaŭ. Pres-słužba BAŽ źviarnułasia pa tłumačeńni ŭ adździeł unutranych spravaŭ Minskaha abłvykankama.

«Heta było patrabavańnie słužby biaśpieki prezidenta, — patłumačyŭ pres-sakratar Alaksandr Danilčanka. — Uvohule, u čas, kali na „Dažynkach“ budzie prysutničać prezident, zdymki zmohuć rabić tolko akredytavanyja pry jaho administracyi žurnalisty. Kali ž prezident źjedzie, režym zdymak źmienicca, ale akredytavacca žurnalistam usio ž pryjdziecca».

Spadar Danilčanka paraiŭ žurnalistam, jakija źbirajucca pracavać u aharodžanaj častcy Maładziečna (pa sutnaści, u centry śviata), źviarnucca pa akredytacyju ŭ Minski abłvykankam. U inšym vypadku, pa słovach pres-sakratara AUS, žurnalistaŭ «vystaviać za miežy režymnaj zony» ci zapatrabujuć schavać aparaturu.

Miž tym, jak patłumačyła BAŽ supracoŭnica Minabłvykankama Iryna Kanavałava, akredytacyja žurnalistaŭ na «Dažynki» skončyłasia jašče 20 vieraśnia.

«Spaźnilisia vašy žurnalisty, tak im i pieradajcie», — prakamientavała situacyju spadarynia Kanavałava.