«Tyja, chto pasadziŭ mianie za kraty, zasłuhoŭvajuć tolki žalu»
2 kastryčnika ŭ Homieli paśla 15-sutkavaha aryštu ź izalataru na volu vyjšaŭ hramadzki aktyvist Źmicier Šaŭčenka.
02.10.2011 / 17:19
Źmicier Šaŭčenka. Fota svaboda.org.
Siabry j paplečniki zmahli sustreć Źmitra tolki kala domu. Za dźvie hadziny da vyznačanaha sudom terminu vyzvaleńnia milicyjanty advieźli aktyvista ŭ Čyhunačny RAUS — tam jon čakaŭ sychodu terminu pakarańnia.
U izalatary Źmicier trymaŭ haładoŭku. Jon abviaściŭ jaje 19 vieraśnia ŭ zali sudu Čyhunačnaha rajonu — adrazu paśla taho, jak sudździa Anatol Sotnikaŭ pakaraŭ jaho aryštam za raspaŭsiud ulotak pra adnaŭleńnie ŭ horadzie akcyi maŭklivaha pratestu «Revalucyja praz sacyjalnuju sietku».
Šaŭčenka: «Pačuvaju siabie niabłaha. Kali paśla sudu mianie pryvieźli ŭ izalatar, ja pierad viačeraj zajaviŭ, što admaŭlajusia ad ježy. Achoŭniki prapanavali mnie napisać zajavu na admovu, i ja napisaŭ. Paru dzion ja nia piŭ ni čaju, ni kisialu. Mnie j pytacca nie chaciełasia, jak heta haładajuć. Paśla staŭ pić čaj. I tut staŭ atrymlivać z voli pieradačy z sokami. Piŭ sok. Dziakuj usim, chto źbiraŭ i pryvoziŭ pieradačy!»
Źmicier kaža, što viarnuŭsia damoŭ u spakojnym nastroi, navat biaz złości na tych, chto spryčyniŭsia da zatrymańnia j aryštu: «Jany zasłuhoŭvajuć chiba tolki žalu — jany słabiejšyja za mianie».
Aktyvista zatrymali specnazaŭcy 17 vieraśnia, akurat na Dzień horadu. Na Prudkoŭskim rynku jon razdavaŭ ulotki. Aktyvista advieźli spačatku ŭ Čyhunačny rajaddzieł, dzie skłali pratakoł na parušeńni paradku arhanizacyi j praviadzieńnia masavaha mierapryjemstva, a zatym u izalatar, dzie jon jašče da sudu pravioŭ dvoje sutak.
U izalatary Źmicier daviedaŭsia, što haładaje nie adzin. Nie spažyvajuć ježu taksama pakaranyja aryštami Andruś Cianiuta (jon vyjšaŭ na volu ŭviečary 30 vieraśnia) i Kastuś Žukoŭski, jakomu złamali nahu i pasadzili za kraty. Jahony termin vyzvaleńnia — 6 kastryčnika.
Za 15 sutak spadar Šaŭčenka pabyvaŭ u 7 kamerach izalataru — takaja «ekskursija» pa niavoli. Apošnija dni siadzieŭ razam z hramadzianinam Pakistanu, jaki ŭžo dva miesiacy čakaje departacyi na radzimu.
Źmicier śćviardžaje, što nie admovicca da hramadzkaj dziejnaści, niahledziačy na toje, što jaho ŭžo dvojčy karali aryštam. U minułym žniŭni toj ža sudździa Sotnikaŭ pastanaviŭ pakarać Šaŭčenku 3 sutkami administracyjnaha aryštu — za zroblenyja zapisy ŭ sacyjalnaj sietcy «Ukantakcie» pra maŭklivuju akcyju pratestu.