Фіналісты фестывалю графіці размалююць сцяну плошчай 200 кв.м

18.10.2011 / 11:33

Фіналісты фестывалю графіці «СтеноГраффия» размалююць 18 кастрычніка сцяну ў Рэспубліканскім цэнтры тэхнічнай творчасці навучэнцаў агульнай плошчай звыш 200 кв.м.
Пра гэта карэспандэнту БелТА паведамілі ў прэс-службе цэнтра.

Фестываль праводзіцца ў два этапы. На першым этапе каманды графіцістаў і асобныя «вулічныя» мастакі дасылалі на адрас арганізатараў эскізы на прапанаваную тэму «Тэхніка на грані фантастыкі»: стылізаваныя выявы машын, робатаў, вядомых вынаходак і іх аўтараў, асацыяцыі, мастацкія вобразы, звязаныя з тэхнічнымі відамі спорту (картынг, Формула-1, суда-, аўта-, авія-, ракетамольны спорт, радыёспорт, мотакрос, аўтагонкі, ралі, трыял), навукова-тэхнічныя фантазіі.

Для ўдзелу ў фінале праекта адабраныя найлепшыя творчыя працы 50 аўтараў з Мінска, Брэста, Баранавіч, Віцебска, Гомеля, Жодзіна, Барысава, Бабруйска, Смаргоні, Астраўца, Слоніма. Своеасаблівы старт праекту будзе дадзены 18 кастрычніка пасля выканання на сцяне першага надпісу: «Мінск — сталіца моладзі!».

Па выніках мерапрыемства дыпломамі і памятнымі падарункамі будуць узнагароджаныя тры найлепшыя каманды. Працы ўсіх фіналістаў будуць апублікаваныя на старонках часопіса «Юны тэхнiк-вынаходнiк» і размешчаныя на інтэрнэт-партале «Моладзь Беларусі» для ўдзелу ў электронным галасаванні. Пераможца галасавання стане ўладальнікам спецыяльнага прыза. Акрамя таго, заснавальнікамі праекта запланаваны выпуск кішэнных календароў з працамі пераможцаў.

Галоўная ідэя фестывалю графіці: замест «вулічнага хуліганства» — сацыяльны праект, замест надпісаў, якія псуюць фасады будынкаў, — жывапісныя карціны ў стылі графіці.

Ачысціць сцены будынкаў ад несанкцыянаваных надпісаў штогод абыходзіцца гарадскому бюджэту сталіцы нятанна. У 2010 годзе на прывядзенне ў парадак 4,5 тыс. фасадаў дамоў давялося выдаткаваць больш за Br83 млн, у 2011 годзе — каля Br78 млн больш чым на 3,5 тыс. будынкаў.