Беларусь і «Газпрам» клянуцца, што падпішуць кантракт у лістападзе

18.10.2011 / 12:06

Беларусь і Расія пацвярджаюць гатоўнасць да падпісання кантракта па газе і заключэння здзелкі па «Белтрансгазе» ў лістападзе.
Пра гэта паведамляе прэс-служба «Газпрома» па выніках сустрэчы старшыні праўлення расійскай кампаніі Аляксея Мілера і віцэ-прэм’ера ўрада Беларусі Сяргея Румаса, якая прайшла 17 кастрычніка.

«Бакі завяршаюць узгадненне палажэнняў кантракта на пастаўку і транспарціроўку расійскага газу цераз тэрыторыю Беларусі, а таксама здзелкі па павелічэнні долі „Газпрома“ ў ААТ „Белтрансгаз“ да 100%», — гаворыцца ў паведамленні.

Паводле інфармацыі прэс-службы, удзельнікі сустрэчы адзначылі, што ўсе дакументы будуць гатовыя да падпісання ў лістападзе.

Дзейны кантракт «Газпрома» і «Белтрансгаза» на пастаўку і транзіт газу заканчваецца 31 снежня 2011 года. Меркаваная дзейным кантрактам газавая формула прадугледжвала паніжальныя каэфіцыенты да цаны на 2008–2010 гады (0,67, 0,8 і 0,9 адпаведна), у 2011 годзе цана стала рыначнай.

У жніўні 2011 года прэм’ер-міністр Расіі Уладзімір Пуцін даручыў Мінэнерга і «Газпрому» вызначыць велічыню паніжальнага каэфіцыента цаны на газ для Беларусі з 2012 года. Паводле слоў кіраўніка расійскага ўрада, увядзенне «інтэграцыйнага» каэфіцыента абумоўлена інтэграцыяй у межах Мытнага саюза і ўвязана з пытаннем набыцця «Газпромам» другой паловы «Белтрансгаза». «Газпром» ужо валодае 50% акцый «Белтрансгаза».