З-за валютнага крызісу ў Беларусі быў пад пагрозай зрыву матч зорак тэніса Еўропы і Азіі

26.10.2011 / 09:38

Пра гэта паведаміў на прэс-канферэнцыі 25 кастрычніка дырэктар турніру, трэнер зборнай Еўропы Аляксандр Пяткевіч. Паводле яго слоў, спаборніцтвы ў выніку адбудуцца — 29–30 кастрычніка ў мінскім Палацы спорту.

«Гэта вялікія затраты: харчаванне, размяшчэнне, транспарт. Але галоўны артыкул — прызавы фонд у памеры 85 тыс. еўра, — адзначыў Пяткевіч. — Летась мы закрылі б гэта пытанне бязбольна, а ў гэтым было штосьці катастрафічнае з-за немагчымасці купіць валюту. Мы былі на грані адмовы і ў чэрвені адправілі ліст у еўрапейскую федэрацыю. Прыйшоў жорсткі адказ з пагрозай адхіліць нашы каманды ад удзелу ў еўрапейскіх чэмпіянатах. Я напісаў, што гэта поўная бязглуздзіца, бо падобныя санкцыі не прадугледжаны кантрактам на правядзенне матчу».

Паводле слоў Пяткевіча, які з’яўляецца таксама галоўным трэнерам нацыянальнай каманды Беларусі па настольным тэнісе,

выручыў генеральны спонсар зборнай «Банк ВТБ», але і то толькі пасля прамога звароту ў галаўны маскоўскі офіс.

Падрыхтоўка да матчу праходзіць ва ўмовах аўралу, сказаў дырэктар. «Грошы з Мінспорту прыйшлі толькі два дні таму. Толькі заўтра з Шанхая прыбывае пакрыццё, трэба правесці мытнае афармленне. Калі не паспеем, давядзецца выкарыстоўваць тое, што будзе задзейнічана сёння на матчы Еўрапейскай лігі нацый Беларусь-Расія. Яго ўжо 30 ці 40 разоў выкарыстоўвалі, таму будуць сляды, але выбар такі: спаборніцтвы ці праводзіць, ці адмяняць», — заявіў Пяткевіч.

Удзельнікі матчу будуць жыць у гасцініцы «Вікторыя» і — дзякуючы сваёй нешматлікасці — перамяшчацца на аўтамабілях прэміум-класа.

29 кастрычніка спаборніцтвы пачнуцца ў 16.00, 30-га — у 13.00. Кошт білетаў 20, 30 і 50 тыс. рублёў.

У першы дзень пройдуць матчы Міхаэль Мазе (Данія) — Гаа Нін (Сінгапур), Аляксей Смірноў (Расія) — Чжы-Янь Чжуан (Тайвань), Уладзімір Самсонаў (Беларусь) — Джу Се Х’юк (Паўднёвая Карэя), Дзмітрый Аўчараў (Германія) — Сюй Сінь (Кітай) і Адрыен Матне (Францыя) — Тан Пэн (Ганконг).

У другі дзень будуць сапернічаць: Міхаэль Мазе — Тан Пэн, Адрыен Матне — Чжы-Янь Чжуан, Дзмітрый Аўчараў — Джу Се Х’юк, Уладзімір Самсонаў — Сюй Сінь, Аляксей Смірноў — Гаа Нін.

Матчы Еўропа-Азія пачаліся ў 2009 годзе. Праект разлічаны на пяць гадоў. Спаборніцтвы праводзяцца два разы на год, спачатку ў адной з азіяцкіх краін, затым — у адной з еўрапейскіх. Па выніках сустрэчы, якая прайшла 1–2 сакавіка гэтага года ў Пекіне, перамогу атрымала Азія (6:4).