Мінская прыбіральшчыца падманула бізнэсоўца на паўмільёна даляраў

27.10.2011 / 12:11

Прыбіральшчыца адной з буйных сталічных арганізацый падманам выцягнула ў салігорскага бізнэсоўца амаль паўмільёна даляраў, паабяцаўшы значна павялічыць гэтую суму за кошт выгаднага абменнага курса.

Як паведаміла прэс-афіцэр Першамайскага РУУС Мінска Вольга Куцько, 31-гадовы мужчына збіраўся заняцца рэстаранным бізнэсам, а жанчына прапанавала яму зарабіць на курсе валют.

Яна сказала, што з’яўляецца прадстаўніком спажывецкага кааператыва, які праводзіць валютна-абменныя аперацыі ў Мінску. Спачатку мужчына перадаў жанчыне $ 10 тыс. і, атрымаўшы нядрэнны прыбытак, перадаў ёй яшчэ $ 200 тыс. Аднак ні сваіх грошай, ні прыбытку ён не ўбачыў — дама патлумачыла, што грашовыя сродкі знаходзяцца ў абароце.

Гэта не спыніла камерсанта, і ён уклаў у яе «справу» дадатковую суму. У выніку пацярпелы недалічыўся $ 447 тыс. і звярнуўся ў міліцыю. Зламысніцу затрымалі і змясцілі ў СІЗА, у дачыненні да яе распачатая крымінальная справа за махлярства.