Новы ўрад Егіпта ўзначаліць былы прэм'ер Камаль аль-Ганзуры

25.11.2011 / 10:37

Найвышэйшая ваенная рада Егіпта прапанавала былому прэм’ер-міністру краіны Камалю аль-Ганзуры сфармаваць новы ўрад.
Пра гэта паведамляюць егіпецкія дзяржаўныя СМІ.

Аль-Ганзуры ўзначальваў егіпецкі кабінет міністраў з 1996 па 1999 год. Папярэдні ўрад, прызначаны вайскоўцамі, сышоў у адстаўку на хвалі масавых беспарадкаў, ахвярамі якіх сталі каля сарака чалавек.

Раней у чацвер Найвышэйшая ваенная рада выбачылася перад сем’ямі загінулых і паабяцала, што вінаватыя ў гібелі людзей паўстануць перад судом.

Дэманстрацыі ў Каіры з патрабаваннем неадкладнай перадачы ўлады грамадзянскаму ўраду спыненыя, аднак актывісты заклікаюць да працягу пратэстаў у пятніцу.

У панядзелак у Егіпце павінныя пачацца парламенцкія выбары.