Biełaruskija palarniki adpravilisia ŭ Antarktydu

07.12.2011 / 09:28

6 śniežnia startavała čarhovaja biełaruskaja palarnaja ekśpiedycyja.

Jak paviedamiŭ načalnik Respublikanskaha centra palarnych daśledavańniaŭ (RCPD) Uładzimir Filimonaŭ, siońnia biełaruskija palarniki vylecieli ź Minska ŭ Kiejptaŭn praz Abu-Dabi.

Sioleta z ulikam ekanamičnaj situacyi ŭ Antarktydu nakiravali tolki dvuch biełarusaŭ
 — kiraŭnika ekśpiedycyi namieśnika načalnika RCPD Alaksieja Hajdašova i supracoŭnika Nacyjanalnaha navukova-daśledčaha centra manitorynhu azonaśfiery BDU Viktara Dziomina. Jany buduć pracavać u składzie 57-j rasijskaj antarktyčnaj ekśpiedycyi.

7 śniežnia biełaruskija palarniki dałučacca da rasijskich kalehaŭ na sudnie «Akademik Fiodaraŭ», a 10-ha «Akademik Fiodaraŭ» nakirujecca z Kiejptaŭna ŭ Antarktydu. Prybyćcio palarnikaŭ na rasijskuju stancyju «Maładziožnaja» čakajecca 18 śniežnia.

Biełaruskim palarnikam nieabchodna vykanać kompleks navukovych daśledavańniaŭ, a taksama inžynierna-techničnych i łahistyčnych mierapryjemstvaŭ. Hajdašoŭ budzie pravodzić bijałahičnyja, hieałahičnyja, hieafizičnyja i šerah inšych daśledavańniaŭ, Dziomin — azonamietryčnyja, a taksama daśledavańni aerazolnaha i hazavaha składu atmaśfiery z punktu hledžańnia ŭpłyvu na hłabalnyja źmieny klimatu.

Jak paviedamiŭ niezadoŭha da adjezdu ŭ ekśpiedycyju Hajdašoŭ, daśledavańni składu atmaśfiery źjaŭlajucca asabliva cikavymi: rasijanie takich nie pravodzili. Antarktyda, adznačyŭ jon, źjaŭlajecca idealnym palihonam dla vyvučeńnia prazrystaści atmaśfiery i ŭtrymańnia ŭ joj zavisłych čaścinak — heta samy čysty maciaryk, na jakim minimizavanyja antrapahiennyja ŭździejańni. Luboje vyviaržeńnie vułkana, hłabalny pieranos pramysłovych vykidaŭ buduć dobra prasočvacca na ladovym macieryku, što dazvolić zrabić zaklučeńnie pra ich upłyŭ na klimat.

Z troch z pałovaj miesiacaŭ u Antarktydzie dva z pałovaj biełaruskija palarniki buduć pracavać aŭtanomna ŭ palavym łahiery kala bazy «Hara Viačerniaja». Jany zojmucca pierakansiervacyjaj i absłuhoŭvańniem abstalavańnia ŭ hetym palavym łahiery. Biełarusy taksama voźmuć udzieł u abstalavańni trasy, jakaja źviaža «Haru Viačerniuju» sa stancyjaj «Maładziožnaja». Akramia taho, abodva palarniki voźmuć udzieł u padrychtoŭcy ŭźlotna-pasadačnaj pałasy kala rasijskaj stancyi «Maładziožnaja».

Viartańnie palarnikaŭ na radzimu čakajecca ŭ kancy maja.