Vaśkovič: «Pierastańcie nazyvać mianie anarchistam, ja nacyjanalist»

Chłopca, jaki špurnuŭ kaktejl Mołatava ŭ budynak KDB, pieraviali ŭ «krytku».

08.12.2011 / 11:42

Jaŭhien Vaśkovič siadzić u mahiloŭskaj turmie ŭ kamiery na troch čałaviek. Z kałonii jaho pieraviali ŭ «krytku» (turmu kamiernaha typu) za parušeńni. U tym liku za toje, što admaŭlaŭsia addavać kantraloram biełaruskajmoŭnuju Bibliju.

18 listapada jon vyjšaŭ z ŠYZA, dzie pravioŭ miesiac.

Siadzieć jamu niepasredna ŭ turmie jašče 3 hady, ale i paśla hetaha da kanca terminu budzie jašče vielmi daloka… Pra «UDO» (umoŭna-daterminovaje vyzvaleńnie) ci «zamienu režymu» možna zabyć u pryncypie — heta tyčycca amal vyklučna bryhadziraŭ dy zahhasaŭ atradaŭ ź liku samich zekaŭ. Asabistamu vorahu Kamitetu dziaržbiaśpieki nie prychodzicca raźličvać na niejkija pasłableńni…

U svaim apošnim liście Vaśkovič piša: «Zrabicie, kali łaska, što-chacia, kab u presie mianie pierastali nazyvać anarchistam. Ja byŭ, jość i budu nacyjanalistam».

Jon prosić u listach dasłać jamu teksty patryjatyčnych piesień i publikacyi na nacyjanalnuju tematyku.

U svoj čas mnie daviałosia pierasiakacca z anarchistami na Vaładarcy i ŭ Navapołacku (turma zaŭždy šlifuje ideałahičnyja supiarečnaści). Dyk voś, jany byli zavalenyja listami jak ź Biełarusi, tak i z-za miažy. Heta była ich, anarchisckaja salidarnaść.

Spadarstva, pišycie i Vy Jaŭhienu ŭ turmu № 4 h. Mahilova, u kamieru 150.

Vysyłać pažadana nie bolej za 10 arkušoŭ, razdrukavanych z dzvuch bakoŭ šryftom Miryad Pro z kiehlem 7,5.

Svoj apošni list Vaśkovič skančaje vieršam Arsieńnievaj:

Biełaruś, naša Maci-Kraina,
Ty z nas mocnych zrabiła ludziej…

* * *

Jaŭhien Vaśkovič 212011, h. Mahiloŭ, vuł.Krupskaj, 99a, turma № 4.

Aleś Kirkievič, Hrodna, były palitviazień