У гатэлях Мінска няма свабодных месцаў

19.12.2011 / 12:31

Чаму на навагоднія святы ў гатэлях Мінска няма свабодных месцаў? Колькі гатэляў эканом-класа неабходныя сталіцы, каб паспяхова развіваць уязны турызм?

На навагоднія святы гатэлі Мінска занятыя

— У нас забраніраваныя ўсе нумары яшчэ з пачатку снежня і да сярэдзіны студзеня, — расказалі ў гатэлі «Акадэмічны». — Асноўная маса — расіяне. Людзі прыязджаюць на святы да сваякоў і знаёмых, а спыняюцца ў нас.

Такая ж сітуацыя і ў іншых гатэлях сярэдняга класа. Цэны ў іх нізкія, зняць нумар там заўсёды няпроста, а тым больш на калядныя вакацыі.

У даражэйшых гатэлях, такіх як «Мінск», «Планета», «ІББ гатэль», месца яшчэ можна знайсці, але там і цана нумара вышэйшая, і на калядныя вакацыі дзейнічае дадатковы пакет паслуг. Гатэлі чатырох-і пяцізоркавыя для замежных турыстаў на навагоднія святы прапануюць не проста рассяленне, але і навагоднюю праграму, святочнае меню і разнастайныя экскурсіі.

Мінск ужо даўно адчувае востры недахоп гатэляў сярэдняга класа

Па словах намесніка міністра жыллёва-камунальнай гаспадаркі Мікалая Ліпеня, у 2011 годзе загрузка мінскіх гатэляў перавысіла 60%.

— У цэлым па рэспубліцы запаўняльнасць складае каля 50%. Найбольш запатрабаваныя паслугі гатэльных гаспадарак у беларускай сталіцы, найменш — у Гродзенскай вобласці, — канстатуе эксперт.

— Цяпер у Мінску функцыянуе 27 гатэляў на 3100 нумароў, разлічаных на 5300 месцаў, — кажа Вадзім Кармазін, дырэктар дэпартамента па турызме Міністэрства спорту і турызму. — Паводле нашых дадзеных, яшчэ каля 4 тысяч кватэр па Мінску здаюцца. Гэта каласальны пласт, з якім можа працаваць беларускі турызм. Гэта значыць, аб’ектыўна мы нават не можам уявіць, колькі чалавек наведвае Мінск штогод.

Паводле падлікаў Міністэрства спорту і турызму, у цэлым Беларусі не хапае каля 100 гатэляў сярэдняга класа.

Тры гатэлі, пабудаваныя некалькі гадоў таму: «Еўропа», «Краўн Плаза» і «Вікторыя» — вельмі дарагія, яны не па кішэні звычайнаму турысту.

Можна сказаць, што сітуацыя на рынку гатэльных паслуг Мінска не мяняецца з 1960 -1980-х гадоў, калі былі пабудаваныя асноўныя гатэлі сярэдняга класа — «Беларусь», «Юбілейны», «Спадарожнік».

Андрэй Жарынаў, кіраўнік інвестыцыйнай кампаніі «Paternus Тэра», дае адназначны адказ на сітуацыю, якая склалася: «Гатэлі эканом-класа ў Мінску будаваць нявыгадна».

— Нават у Еўропе будаваць двух- і трохзоркавыя гатэлі нявыгадна, — кажа ён. — Еўрапейскім гатэлям эканом-класа па дзвесце гадоў. Яны калісьці былі пяцізоркавымі, паступова сталі двух. Акупнасць такіх гатэляў 20 гадоў, а праз 20 гадоў там ужо трэба рабіць капітальны рамонт. Для інвестара ў гэтай сферы няма бізнэсу.

Андрэй Стась, кіраўнік расійскай групы кампаній «Stas Marketing Partners», адказваючы на пытанне, быў не такі катэгарычны:

— За кошт чаго ў свеце развіваюцца гатэлі эканом-класа? За кошт буйных гатэльных сетак. Напрыклад, «Ібіс» — велізарная сетка трохзоркавых гатэляў — мае некалькі тысяч аб’ектаў па ўсім свеце. Адпаведна, эфект маштабу ім дазваляе быць эфектыўнай кампаніяй, маючы рэнтабельнасць 1,5–2%. А сеткі прыходзяць туды, дзе ёсць вялікі стабільны турыстычны паток, дзе сярэднегадавая запаўняльнасць гатэляў будзе вышэйшай за 60%.

На думку эксперта, «фаза пяцізоркавых гатэляў» неабходная для таго, каб інвестары, якія прыязджаюць у гэтыя пяцізоркавыя гатэлі, пазнаёміліся з краінай, захацелі ўкладваць у краіну грошы і потым ужо пацягнулі за сабой «лакаматыў» уязнога патоку.

Толькі пасля таго, як сярэднегадавая запаўняльнасць гатэляў у Беларусі стане вышэйшай за 60%, інвестары захочуць будаваць у нас годныя і даступныя гатэлі.

Міністэрства спорту і турызму запэўнівае, што да 2014 года колькасць гатэляў у Мінску істотна павялічыцца

Пад будаўніцтва фешэнебельных (4–5 зорак) і масавых (3 зоркі) гатэляў выдзеленыя дзесяткі будаўнічых пляцовак.

Паводле папярэдніх падлікаў, у 2014 годзе на Чэмпіянат свету па хакеі ў Мінск прыедуць каля 35 тысяч гасцей: удзельнікаў, заўзятараў і турыстаў. Для вырашэння іх жыллёвага пытання ўлады горада плануюць задзейнічаць і фонд наёмнага жылля.

realty.ej.by