Barak Abama padpisaŭ Akt ab demakratyi ŭ Biełarusi

Zakon praduhledžvaje ŭviadzieńnie novych sankcyj adnosna biełaruskaha kiraŭnictva. Sankcyi nie buduć źniatyja da toj pary, pakul na svabodu nie vyjduć usie palitviaźni.

04.01.2012 / 16:12

Fota AFP.

Prezident ZŠA Barak Abama padpisaŭ zakon, jaki praduhledžvaje ŭviadzieńnie novych sankcyj suprać kiraŭnictva Biełarusi, paviedamiŭ pres-sakratar Biełaha doma Džej Kerni.

Raniej, 21 śniežnia, Kanhres ZŠA uchvaliŭ Akt ab demakratyi i pravach čałavieka 2011 hoda ŭ dačynieńni da Biełarusi (Belarus Democracy and Human Rights Act of 2011), jaki praduhledžvaje ŭzmacnieńnie sankcyj.

Novy pakiet pašyraje śpis biełaruskich čynoŭnikaŭ i pradstaŭnikoŭ siłavych strukturaŭ, na jakich nakładvajucca vizavyja abmiežavańni i finansavyja sankcyi.

Zakon taksama ŭtrymlivaje zaklik da Mižnarodnaj fiederacyi chakieja admovicca ad praviadzieńnia ŭ Biełarusi čempijanatu śvietu pa chakiei 2014 hoda.

U siaredzinie śniežnia zakonaprajekt byŭ uchvaleny Sienatam ZŠA.

Sankcyi nie buduć źniatyja da toj pary, pakul na svabodu nie vyjduć usie palitviaźni.

«Z hetymi sankcyjami my na baku biełaruskaha narodu i suprać jaho pryhniatalnikaŭ», — zajaviŭ adzin ź inicyjataraŭ zakonaprajekta kanhresmien Krystafier Śmit.

Pryniaty Kanhresam Akt ab demakratyi i pravach čałavieka 2011 ŭzmacniaje i pašyraje Akt ab demakratyi ŭ Biełarusi 2004 hoda i ŭdakładniaje akt ab demakratyi 2006-ha.
Akt ab demakratyi ŭ Biełarusi 2004 hoda, u pryvatnaści, patrabuje ad prezidenta ZŠA padrabiazna infarmavać Kanhres pra ŭsie pastaŭki «ŭzbrajeńniaŭ i źviazanych z uzbrajeńniami technałohijaŭ», jakija «Biełaruś pastaŭlaje krainam-fundataram mižnarodnaha teraryzmu».

Dakumient taksama praduhledžvaŭ vydzialeńnie ź fiederalnaha biudžetu ZŠA srodkaŭ na padtrymku demakratyčnych pracesaŭ u Biełarusi.

Pra namier čarhovy raz pašyryć śpis sankcyj suprać kiraŭnictva Biełarusi prezident ZŠA Barak Abama zajaviŭ u traŭni 2011-ha, pieradaje rasijskaje infarmacyjnaje ahienctva «Novosti».