Дашкевіча спрабавалі сілай пасадзіць да «апушчанага»
Сёння ў Глыбоцкай калоніі адбылася сустрэча Дашкевіча з адвакатам.
17.02.2012 / 15:43
Пра гэта паведаміла нявеста палітвязня Наста Палажанка. Па яе словах, сустрэча праходзіла ў нервовай атмасферы: Дашкевіча перапынялі супрацоўнікі калоніі і пагражалі ўвогуле спыніць сустрэчу.
Аднак палітвязень паспеў паведаміць, што супрацоўнікі калоніі спрабавалі сілай завесці яго ў камеру да зняволенага з нізкім сацыяльным статусам, так званага «апушчанага». Паводле негалосных правілаў, якія існуюць сярод зэкаў, гэта аўтаматычна перавяло б самога Дашкевіча ў такі статус. Зміцер адмаўляўся ад гэтага, за што яго змясцілі ў ШІЗА.
Як мяркуе Дашкевіч, супраць яго ладзілі гэтую правакацыю, каб потым пачаць на яго крымінальную справу за супраціў супрацоўнікам калоніі і дадаць яшчэ тэрміну зняволення.
Нагадаем, палітвязню засталося адбываць пакаранне роўна 10 месяцаў.