БелАЗ сустракае ўдзельнікаў чэмпіянату свету па фігурным катанні

28.02.2012 / 10:59

«Своеасаблівай фішкай» шакуюць у Беларусі гасцей і ўдзельнікаў чэмпіянату свету па фігурным катанні. Беларускі саюз канькабежцаў вырашыў шакаваць гасцей і ўдзельнікаў юніёрскага чэмпіянату свету па фігурным катанні выглядам велізарнага 90-тоннага БелАЗа каля ўваходу ў «Мінск-Арэну».

Па задуме, грузавік павінен стаць дэманстрацыяй вытворчай моцы Беларусі гасцям з 52 краін. Генеральны дырэктар «Мінск-Арэны» Мікалай Ананьеў назваў машыну «своеасаблівай фішкай турніру».

Для таго, каб прыгнаць такі велікагрузны аўтамабіль у Мінск, патрэбны спецыяльны праект дастаўкі, дазвол дарожнікаў, суправаджэнне ДАІ. Аднак пасля ўмяшання прэм’ер-міністра задача спрасцілася, і ўжо 25 лютага, за два дні да пачатку чэмпіянату, грузавік усталююць насупраць уваходу на трыбуну «А».

У задуме арганізатараў прысутнічала таксама дэманстрацыя расійскага Ё-мабіля, але беларускі бок не захацеў даваць бясплатную рэкламу стварэнню Міхаіла Прохарава.