Любові Кавалёвай адмовілі

Маці асуджанага прасіла парламент звярнуцца ў Канстытуцыйны суд наконт неадпаведнасці смяротнага пакарання.

28.02.2012 / 13:09

Палата прадстаўнікоў і савет рэспублікі нацыянальнага сходу Беларусі адмовілі Любові Кавалёвай, маці прысуджанага да смяротнага пакарання Улада Кавалёва.

Любоў Кавалёва ў сваім лісце заклікала гэтыя ўстановы звярнуцца ў Канстытуцыйны суд, каб той разгледзеў неадпаведнасць Крымінальна-выканаўчага кодэксу Беларусі Канстытуцыі РБ і Факультатыўнаму пратаколу да Міжнароднага пакта аб грамадзянскіх і палітычных правах.

— У Крымінальна-выканаўчым кодэксе палажэнняў, якія б прадугледжвалі прыпыненне выканання прысуду ў выглядзе смяротнага пакарання ў сувязі з тым, што я звяртаюся ў міжнародныя арганізацыі, няма. Выкананне прысуду можа адбыцца ў любы момант. Прыйшлі адказы з гэтых дзвюх арганізацый: падстаў для звароту ў Канстытуцыйны суд, на іх погляд, няма.

У адказах нагадваецца аб праве абскардзіць прысуд ў парадку нагляду ў Вярхоўны суд і на памілаванне прэзідэнтам. Як лічыць Любоў Кавалёва, падкрэсліваюцца магчымасці абароны, прадугледжаныя беларускім заканадаўствам.

«Пытанне пра памілаванне пакуль не разглядалася ў адміністрацыі прэзідэнта, за якім застаецца вырашальнае слова,« — кажа Любоў Кавалёва.

Уладзіслаў Кавалёў і Дзмітрый Канавалаў былі прысуджаныя да смяротнага пакарання за тэрарызм. Кавалёў — за саўдзел у тэрарызме. Па версіі следства, ён ведаў пра падрыхтоўку тэрактаў, але не паведаміў кампетэнтным органам. Кавалёў падчас суду заявіў пра сваю невінаватасці.