BPC asudžaje pryniaćcie zakona ab dapamožnych repraduktyŭnych technałohijach

15.03.2012 / 16:07

Biełaruskaja pravasłaŭnaja carkva (BPC) asudžaje pryniaćcie zakona ab dapamožnych repraduktyŭnych technałohijach. Pra heta zajaviŭ kiraŭnik kirunku pa abaronie maciarynstva i siamiejnych kaštoŭnaściaŭ Minskaj jeparchii, ijerej Dźmitryj Hrycenka 15 sakavika ŭ Minsku na pasiadžeńni kruhłaha stała na temu «Relihijny faktar nacyjanalnaj biaśpieki Biełarusi».

Pavodle jaho słoŭ, zakanadaŭčaje zamacavańnie surahatnaha maciarynstva ŭraŭnoŭvaje Biełaruś «z krainami treciaha śvietu, dzie žančyny zarablajuć hrošy, naradžajučy dziaciej na prodaž».

Pradstaŭnik BPC taksama vystupiŭ suprać štučnaha apładnieńnia.

Pavodle jaho słoŭ, u zakonie šmat supiarečnaściaŭ z zakanadaŭstvam Biełarusi, jaje duchoŭnaściu i tradycyjnaj marallu.

«Z adnaho boku, tam možna pračytać ab tym, što embryjon, jaki maje čałaviečuju hodnaść, nie padlahaje nijakim daśledavańniam. Ź inšaha boku, praz dva radki havorycca, što kali zarodak čałaviečy ŭzrostu da 15 dzion, to možna na im pravodzić daśledavańni ŭ navukovych metach», — skazaŭ Hrycenka.

Jon nahadaŭ, što napiaredadni pryniaćcia zakona parłamientam suprać jaho vystupali i pravasłaŭnaja, i katalickaja cerkvy, adnak deputaty nie prysłuchalisia da ich mierkavańnia.

Akademik-sakratar adździaleńnia humanitarnych navuk i mastactvaŭ Nacyjanalnaj akademii navuk

Alaksandr Kavalenia prapanavaŭ pradstaŭnikam duchavienstva i navukovaj hramadskaści padrychtavać zvarot da parłamientaryjaŭ z prośbaj pierahledzieć zakon.

Zakonaprajekt ab dapamožnych repraduktyŭnych technałohiach (DRT) byŭ pryniaty abiedźviuma pałatami parłamienta ŭ śniežni minułaha hoda i 7 studzienia padpisany prezidentam.

Zakon vyznačaje pravavyja i arhanizacyjnyja asnovy prymianieńnia DRT i zabieśpiačeńnie pravoŭ hramadzian pry ich prymianieńni. Ustanoŭlena, što DRT źjaŭlajucca mietadam akazańnia miedycynskaj dapamohi, heta značyć mohuć užyvacca tolki ŭ dačynieńni da asob, jakija majuć prablemy z repraduktyŭnym zdaroŭjem. Zakon taksama ŭtrymlivaje pałažeńni, što rehulujuć pytańni donarstva pałavych kletak, ich zachoŭvańnia i vykarystańnia, a taksama zakanadaŭča zamacoŭvajucca pravy pacyjenta pry ŭžyvańni hetych technałohij. Praduhledžanaja zabarona na vykarystańnie embryjonaŭ u navukova-daśledčych metach. U dakumiencie, akramia inšaha, vyznačany ŭmovy i paradak prymianieńnia mietadu EKA, surahatnaha maciarynstva i štučnaj insieminacyi. Pry hetym upieršyniu vyznačany patrabavańni, što pradjaŭlajucca da surahatnych maci, ich pravy i abaviazki.